थप १६ जनहनमे कोरोना पुष्टि, १ के मृत्यु
पहुरा समाचारदाता
धनगढी, १९ असार । धनगढीस्थित सेती प्रादेशिक अस्पतालके प्रयोगशालामे करल परीक्षणमे शनिच्चरके १६ जनहनमे कोरोना भाइरसके संक्रमण पुष्टि हुइल बा ।
सेती प्रादेशिक अस्पतालके प्रयोगशालामे ७७ नमूना परीक्षण करेबर १६ जनहनमे संक्रमण पुष्टि हुइल अस्पतालके सूचना अधिकारी दिलिपकुमार श्रेष्ठ जानकारी डेलै ।
हाल अस्पतालमे १४ जाने संक्रमित उपचाररत रहल बाटै । जौन मध्ये २ जाने भेन्टिलेटर, ३ जाने आईसीयूमे ओ ७ जाने अक्सिजनके सर्पोटरमे उपचाररत रहल सूचना अधिकारी श्रेष्ठ बटैलै । ओस्टके ४ जनहनके अवस्था भर सामान्य रहल जनाइल बा ।
पाछेक २४ घण्टामे सेती अस्पतालमे ६ जाने चोखाके घर जासेकल बाटै कलेसे ३ जाने बिरामी अस्पतोमे भर्ना हुइल बाटै । पाछेक २४ घण्टामे एक जनहनके मृत्यु हुइल अस्पताल जनैले बा । मृत्यु हुउइयामे कञ्चनपुरके शुक्लाफाँटा नगरपालिका ८ के ७७ बर्षीय महिला रहल बाटी ।
