लक्ष्य अनुसार राजस्व संकलनमे कमि

पहुरा समाचारदाता
कञ्चनपुर, १९ असार । कञ्चनपुर भन्सार कार्यालयसे लक्ष्य अनुसारके राजस्व संकलन करे नैसेकल हो । कोरोना महामारीके प्रभावके कारण भन्सार कार्यालयके लक्ष्य अनुसार राजस्व संकलनमे कमी हुइल हो ।

भन्सार कार्यालयके सुचना अधिकारी प्रमानन्द जोशीके अनुसार कार्यालयसे लक्ष्य अनुसार राजस्व संकलन करक लाग अग्रसर हुइल रलेसे फेन कोरोना महामारीके कारण लक्ष्य अनुसार राजस्व संकलनमे कमी आइल बा ।

‘बिगतके बरसमे निश्चित रुपमे तोकल राजस्व संकलन आर्थिक बरसके मसान्त महिना अगावै संकलन हुइना करल रहे, मने इ बरस भर जेठ मसान्तसम कार्यालयसे लक्ष अनुसार राजस्व संकलन करे नैसेकल हो ।’

सुचना अधिकारी जोशी कहलै, ‘राजस्व संकलनमे असार महिनाके राजस्व जोरल नैहो, असार मसान्त फेन सम्भवतह लक्ष अनुसार राजस्व संकल करे सेकजाइ ।’

कोरोना महामारीके कारण लागु हुइल निषेधाज्ञासे राजस्व संकलनमे कमी आइल बा । जेकर कारण आर्थिक बरसके मसान्त अगावै लक्ष्य अनुसार संकलन करजैना राजस्व असार मसान्त पाछे किल हासिल करे सेकजैना सुचना अधिकारी जोशी बटैलै ।

कञ्चनपुर भन्सार कार्यालयके २०७७/०७८ के कुल लक्ष ३५ करोड ६७ लाख ८ रहल बा । कार्यालयसे भर हालसम ३४ करोड १३ लाख ९ हजार राजस्व संकलन हुइल बा । जौन अनुसार कार्यालयसे कुल लक्ष्यके ९५.६९ प्रतिशत राजस्व संकलन करले बा । संकलन हुइल राजस्वमे असार महिनाके भर नै जोरल कार्यालय जनैले बा ।

कोरोना महामारीसे पैठारी हुइना सामानमे कमी आइल कारण राजस्व संकलनमे कमी हुइल समेत कार्यालयके सुचना अधिकारी जोशी बटैलै ।

कञ्चनपुर भन्सार कार्यालयसे तरकारी, फलफूल, गुड, मिस्री, कपडा, हार्डवेयरके सामान लगायत कृषिजन्य सामग्री भन्सार कार्यालयसे आयात हुइना करठ् । ओस्टके निर्यात हुइना सामान मध्ये रिठा ओ हस्तकलाके सामग्री भारत निर्यात हुइना करल बावै ।