धनगढीमे निःशुल्क लैंगिकमैत्री व्यायम केन्द्र स्थापना
पहुरा समाचारदाता
धनगढी, २० असार । धनगढी उपमहानगरपालिका ओ क्षेत्रीय शहरी विकास आयोजनाके संयुक्त लगानीमे वडा नम्बर ८ मे निःशुल्क लैंगिकमैत्री व्यायम केन्द्र स्थापना हुइल बा ।
कोरोना महामारीके बेला सब जाने घरमे बैठेपरना बाध्यतासे तौल बह्रल साथे शारीरिक व्यायम नैपुगके शरीर अस्वस्थ्य रहलहुकनहे नगरपालिका निःशुल्करुपमे योग अभ्यास केन्द्र सञ्चालनमे नाने लागल हो । यी विधि शरीरहे स्वस्थ्य ढरना एकदम उपयुक्त विधि रहल नगरपालिका उपप्रमुख सुशीला मिश्र भट्ट बटैलि ।
उहाँ अँट्वारके केन्द्रके अनुगमन करटि व्यायम केन्द्रहे लैंगिकमैत्री बनैना यहाँ उपलब्ध फिटनेस सामग्रीमे महिलाहुकनके छुट्टे नेमप्लेट टाँसेक लाग वडाध्यक्ष नरायण बरालहे निर्देशन डेलि ।
उहाँ सार्वजनिक स्थलमे महिलाहुकनके लाग छुट्टे नेमप्लेट नैटाँसटसम महिलाहुक्रे अइना कर्रा मन्ना हुइल ओरसे नगरपालिका फिटनेस सामग्रीमे महिला ओ पुरुष कहिके नेमप्लेट टँस्न अनिवार्य रहल बटैलि ।
व्यायम केन्द्रमे योगाभ्यासके लाग योगहलके फेन व्यवस्था करल बा । व्याय केन्द्र सोम्मार उद्घाटन हुइना उपप्रमुख मिश्र जानकारी डेलि ।
