साउन अन्तिमसे कक्षा १२ के परीक्षा
काठमाडौँ, २० असार । राष्ट्रिय परीक्षा बोर्डसे कक्षा १२ के अन्तिम वार्षिक परीक्षा साउन अन्तिम सातासे सञ्चालन कैना प्रस्ताव कैटी सरकारसे अनुमति मग्ले बा ।
भौतिक रूपमे नै परीक्षा सञ्चालन कैना कहटी बोर्डसे परीक्षाके लाग अनुमति मागल जनैले बा । बोर्डके अध्यक्ष प्रा. चन्द्रमणि पौडेल परीक्षा सञ्चालनके लाग सरकारसे अनुमति डेहल लगत्ते अपनेहुक्रे परीक्षाके प्रक्रिया आघे बह्रैना जानकारी डेलै ।
अध्यक्ष पौडेल लाखौँ विद्यार्थी सहभागी हुइना परीक्षा रहल कारण अनलाइन माध्यमसे परीक्षा सञ्चालन करे नैसेकजैना स्पष्ट करलै । कुछ समय ढिला हुइलेसे फेन भौतिक रूपमे नै परीक्षा सञ्चालन कैना योजना बोर्ड बनैले बा ।
शिक्षा, विज्ञान तथा प्रविधि मन्त्रालयके सहसचिव एवं प्रवक्ता दीपक शर्मा बोर्डके प्रस्तावमे छलफल कैके किल निर्णय हुइना उल्लेख कैटी ओकर लाग कुछ दिन लागे सेक्ना बटैलै । शिक्षा मन्त्रालयसे परीक्षा स्थगित कैना निर्णय नै करल ओरसे परीक्षा सञ्चालनके अनुमतिसम्बन्धी निर्णय फेन सीसीएमसीसे हुइन उहाँ जानकारी डेलै । इहीसे आघे जेठ २६ गतेसे हुइना मेरके तय करल कक्षा १२ के परीक्षा फेन सीसीएमसीसे नै रोक्न निर्णय करल रहे ।
