डा. आरजुसे खाद्य तथा पोषणयुक्त सामग्री वितरण
पहुरा समाचारदाता
धनगढी, २० असार । ग्रामीण महिला विकास तथा एकता केन्द्र (रुडुक) के संस्थापक अध्यक्ष एवं वरिष्ठ सामाजिक अभियन्ता डा. आरजु राणा देउवाके पहलमे अति विपन्न गरिब तथा सीमान्तकृत समुदायके परिवारहे खाद्य तथा पोषणयुक्त सामग्री वितरण करल बा ।
कोरोना महामारी ओ लकडाउनके कारण अति विपन्न गरिब तथा सीमान्तकृत समुदायके परिवारहुकनहे दैनिक जीवन गुजारा करना समेत धौ–धौ परल जानकारी पाइलबाद डा आरजु उहाँहुकनके खाद्य तथा पोषण सुरक्षाके लाग तत्काल उ खाद्य तथा पोषणयुक्त सामग्री वितरण करल हुइट ।
यी क्रममे उहाँ धनगढी उपमहानगरपालिका वडा नम्बर १७ उर्माके सुकुम्बासी शिविरके ४० जाने, फूलवारी बि गाउँके ९, वडा नम्बर ८ के १० ओ वडा नम्बर १ के १ करके ६० जाने अति विपन्न गरिब, दलित, एकल महिला, अपांगता हुइल व्यक्ति, एचआईभी एड्स प्रभावित व्यक्ति तथा सीमान्तकृत समुदायके परिवारहे खाद्यन्न्न सामग्री वितरण करल हो ।
रुडुक मार्फत संस्थापक अध्यक्ष डा. आरजु प्रतिव्यक्ति २५ केजी चामल, मसुर दाल २ केजी, अण्डा १ क्रेट, चना २ केजी, तेल २ प्याकेट, नून १ प्याकेट, चियापत्ती १ प्याकेट, चिनी २ केजी, आलु २.५ केजी, प्याज २.५ केजीके दरसे १ हजार ५ सय केजी चामल, मसुर दाल १ सय २० केजी, अण्डा ६० क्रेट, चना १ सय २० केजी, तेल १ सय २० प्याकेट, नून ६० प्याकेट, चियापत्ती ६० प्याकेट, चिनी १ सय २० केजी, आलु १ सय ५० केजी ओ प्याज १ सय ५० केजी वितरण करल रहे ।
सामाजिक अभियन्ता राणा यीआघे कोरोनाके उच्च जोखिममे बिरामीहे समस्या परल सेती प्रादेशिक अस्पतालहे दुई थान अक्सिजन कन्सनट्रेटर प्रदान करले रहि । उहाँ अक्सिजन प्लान्ट खरिदके लाग धनगढी उपमहानगरपालिकाहे १० लाख रुपैयाँ आर्थिक सहयोग फेन करले बटि ।
पहिल चरणके कोभिड–१९ मे फेन डा.आरजु सुदूरपश्चिमके ९ ठो जिल्ला स्वास्थ्य संस्था एवं प्रसूति गृहमे कोरोना स्वास्थ्य सुरक्षा सामग्री सहयोग करले रहि । अस्टेक उहाँ कैलालीके विपन्न गर्भवती तथा सुत्केरी महिलाहुकनहे पोषणयुक्त खाद्य तथा पोषण सामग्री प्रदान, सीमानाकामे अलपत्र परल नेपालीहुकनहे निःशुल्क खाना, आइसोलेसन तथा क्वारेन्टीनमे स्वास्थ्य तथा सरसफाइके सामग्री सहयोग फेन करले रहि ।
