फिलिपिन्समे सैन्य विमान दुर्घटना, ५० के मृत्यु, ४९ घाहिल
काठमाडौं, २१ असार । फिलिपिन्समे अँट्वार हुइल सैन्य विमान दुर्घटनामे ज्यान गुमाइलके संख्या ५० पुगल बा । दुर्घटनामे ४९ सैनिक घाहिल हुइल बीबीसी जनैले बा ।
अँट्वार सुलु प्रान्तके जोलो द्वीपमे अवतरण करना क्रममे विमान दुर्घटनाग्रस्त हुइल हो । दुर्घटनामे मृत्यु हुइनामे अधिकांश सैनिक रहल बटागिल बा । लकहिड सी–१३० विमानमे ९६ जाने यात्रु सवार रहैं । फिलिपिन्सके रक्षा मन्त्रालयके अनुसार जमिनमे रहल ३ जाने सर्वसाधारणके फेन दुर्घटनामे मृत्यु हुइल बा ।
बीबीसीके अनुसार चरमपन्थी अबु सैय्यफउप्पर कारबाहीके लाग उ सैन्य विमानमे सैनिक पठाइल रहे । सुरुमे ५ जाने हेराइल बटैलेसे फेन उहाँहुकनके उद्धार हुइल बा ।
फिलिपिन्स सेनाके प्रवक्ता एबीएस–सीबीएनसँगके बाटचितमे फ्लाइट डेटा रेकर्डरसे विमान दुर्घटनाके वास्तविक कारण पत्ता लगैना प्रयास हुइटिरहल जनैले बटैं । मेजर जनरल एडगार्ड अरेवालो विमानमे कौनो फेन आक्रमण नैहुइल दाबी करले बटैं । अस्टेक फिलिपिन्स आम्र्ड फोर्सके प्रमुख जनरल सोबजना उ विमान धावनमार्गमे ओभरसुट करे पुगल ओ पुनः अवतरण करना असफल हुइल बटैले बटैं ।
सुलुके मुख्य सहर जोलोमे रहल विमानस्थल पहाडी क्षेत्रसे लग्गे परठ । इस्लामिक स्टेटसँग आबद्ध रहल मानल अबु सैय्यफ समूहसँग लम्मा समयसे संघर्ष चलटा । अन्तर्राष्ट्रिय सञ्चारमाध्यमके अनुसार विमानमे सवार अधिकांश हाले सैन्य प्रशिक्षणमे स्नातक तह उत्तीर्ण रहिट । उहाँहुकनहे चरमपन्थी समूहसँग लरटिरहल एक टास्क फोर्सके हिस्साके रुपमे तैनाथ करे लैगिल रहे ।
