गोलकिपर मार्टिनेज तीन पेनाल्टी रोकलपाछे अर्जेन्टिना फाइनलमे
काठमाडौं, २३ असार । गोलकिपर एमिलियानो मार्टिनेज पेनाल्टी सुटआउटमे नायक बनलबाड अर्जेन्टिना कोपा अमेरिका फुटबलके फाइनलमे प्रवेश करले बा ।
बुधके बिहान हुइल दोसर सेमिफाइनलमे कोलम्बियाहे पेनाल्टी सुटआउटमे ३–२ से हराके अर्जेन्टिना फाइनल पुगल हो । आब अर्जेन्टिना उपाधिके लाग आयोजक ब्राजिलसँग प्रतिस्पर्धा करि ।
ब्रासिलियास्थित नासिओनल स्टेडियममे हुइल खेलके निर्धारित समय १–१ के बराबरीमे ओराइलपाछे खेलके छिनोफानो पेनाल्टी सुटआउटमे हुइल हो । खेलके सातौं मिनेटमे लिओनल मेस्सीके पासमे लाउटारो मार्टनिज गोल करटि अर्जेन्टिनाहे अग्रता डेले रहैं । मने ६२ औं मिनेटमे कोलम्बियाके लुइस डियाज एडविन कार्डोनाके पासमे बराबरी गोल फर्कैलैं ।
निर्धारित ९० मिनेट बराबरी हुइलपाछे खेल सीधे पेनाल्टी सुटआउटमे पुगल । जहाँ अर्जेन्टिनाके लाग चार खेलाडी पेनाल्टी प्रहार करलमे ३ खेलाडी गोल करलैं । कोलम्बिया पाँच पेनाल्टी प्रहार करलमे दुई प्रहार किल गोल हुइल ।
अर्जेन्टिनाके गोलकिपर मार्टिनेज तीन पेनाल्टी बचैलैं । मार्टिनेज डेभिडसन सान्चेज, येरी मिना ओ एडविन कार्डोनाके पेनाल्टी प्रहार बचैलैं । कोलम्बियाके जुवान कुड्राडो ओ मिगुएल बोर्जा किल गोल करलैं ।
अर्जेन्टिनाके लाग कप्तान लिओनल मेस्सी, लियोन्ड्रे परेडेस ओ लाउटारो मार्टिनेज गोल करलैं । रोड्रिगो डे पउलके प्रहार पोष्ट उप्परसे बाहेरहुइल ।
अर्जेन्टिना सन् २०१६ पाछे फाइनलमे पुगल हो । दुई वर्षआघे ब्राजिलमे हुइल प्रतियोगितामे अर्जेन्टिना सेमिफाइनलमे ब्राजिलसँग पराजित हुइल रहे । यीबेर ब्राजिल विरुद्ध बदला लेटि उपाधि जित्ना अवसर अर्जेन्टिनाहे बा ।
ब्राजिल भर पहिल सेमिफाइनलमे पेरुहे हराके फाइनल पुगल हो ।
फाइनल खेल अँट्वार बिहान हुइना बा । १४ वर्षपाछे ब्राजिल ओ अर्जेन्टिना कोपाके फाइनलमे भिड्ना हुइल बटैं । सन् २००७ मे ब्राजिल फाइनलमे अर्जेन्टिनाहे पराजित करले रहे ।
सेमिफाइनलमे पराजित पेरु ओ कोलम्बियाबीच तेसर स्थानके लाग खेल हुइना बा ।
