लाश व्यवस्थापनके लाग सहयोग

पहुरा समाचारदाता
बर्दिया, २३ असार । राजापुर प्राथमिक स्वास्थ्य केन्द्रके पोष्टमार्टम सेन्टरमे अव्यवस्थित लाशके व्यवस्थापन करेक लाग मर्चुअरी च्याम्बर सिंगल बडी किनेक लाग युनिक नेपालसे राजापुर नगरपालिकाहे नगद ३ लाख रुप्या सहयोग करले बा ।

युनिक नेपालके उद्देश्य ओ आर्थिक वर्ष २०७७/७८ के नीति तथा कार्यक्रम अन्तर्गत स्वास्थ्य उपकरण सहयोग कार्यक्रम रहलमे राजापुर नगरपालिका मार्फत राजापुर स्वास्थ्य केन्द्रहे उ सामग्रीके लाग नगद सहयोग करल हो । अज्ञात लाशहे समयमे पहिचान नइहुइल अवस्थामे दुर्गन्ध फैल्ना साथे स्वास्थ्यमे प्रतिकुल असर पर्ना करल बा ।

टबमारे ओसिन लाश हाली सरनासे बचैना ओ गन्ध फैले नइडेहक लााग मर्चुअरी च्याम्बर आवश्यक रहल ओरसे युनिक नेपालसे उ सहयोग करल युनिक नेपालके अध्यक्ष प्रिमबहादुर थारु बटैलै । साथे, आगामी दिनमे फे युनिक नेपाल ओ राजापुर नगरपालिके बीच टमान कार्यक्रममे साझेदारी ओ सहकार्य रहनाफे बटैलै ।

युनिक नेपालके यी सहयोग सर्हानीय बा । यी सहयोगसे लाश व्यवस्थापनके साथे फैल्ना दुर्गन्धसे नागरिकमे परे जैना प्रतिकुल असरसे बचाई सेक्जाई, राजापुर नगरपालिकाके नगरप्रमुख शिवप्रसाद चौधरी आभार व्यक्त करलै । ४ लाख ९५ हजार पर्ना उ च्याम्बरके लाग युनिक नेपालसे चेक मार्फत रु. ३ लाख ओ राजापुर नगरपालिकासे १ लाख ९५ हजार बेहोरले बा ।