थप २ हजार ७७ कोरोना संक्रमित, २८ के मृत्यु
काठमाडौं, २३ असार । बिटल २४ घण्टामे नेपालमे २ हजार ७७ जहनमे कोरोना भाइरस संक्रमण डेखाइल बा । स्वास्थ्य मन्त्रालयके अनुसार ७ हजार ८३५ पीसीआर परीक्षणमे बुधके रोज थप २ हजार ७७ जहनमे संक्रमण पुष्टि हुइल हो । यी सँगे नेपालमे कोरोना भाइरससे संक्रमित हुइनाके संख्या ६ लाख ५० हजार १६२ पुगल बा ।
अस्टेक एन्टिजेन विधिसे करल ४ हजार ६३ परीक्षणसे ९०२ जहनमे पोजिटिभ डेखाइल बा । २४ घण्टामे पीसीआर ओ एन्टिजेन विधिसे करल ११ हजार ८९८ परीक्षणमे २ हजार ९७९ जहनमे संक्रमण पुष्टि हुइल मन्त्रालय जनैले बा ।
पाछेक २४ घण्टामे थप १ हजार ३३३ जाने संक्रमणमुक्त हुइल बटैं । हालसम ठिक हुइनाके संख्या ६ लाख १४ हजार ३२७ रहल बा । नेपालमे कोरोना संक्रमणसे थप २८ जहनके मृत्यु हुइल बा । हालसम कोरोनासे मृत्यु हुइनाके संख्या ९ हजार २९१ पुगल बा ।
हालसम देशभर ३३ लाख ९१ हजार ३७९ नमुनाके पीसीआर परीक्षण हुइल बा । क्वारेन्टाइनमे ३२३ जाने रहल बटैं कलेसे आइसोलेसनमे रहलके संख्या २६ हजार ५४४ बा ।
यिहेबीच काठमाडौं उपत्यकामे बिटल २४ घण्टामे ५४३ जाने संक्रमित थपल बटैं । मन्त्रालयके अनुसार काठमाडौं ३९०, ललितपुर ८७ ओ भक्तपुरमे ६७ जहनमे संक्रमण डेखाइल हो ।
