लगातार वर्षाके सम्भावना
काठमाडौँ, असार २५ गते । यी वर्ष मनसुनके पूरे अवधि वर्षामय हुइना अनुमान मौसमविद् करले बटैं । मनसुन सुरु हुइल एक महिना लगातार वर्षा हुइलेसे फेन ‘मनसुन ब्रेक’ नैहुइल यी वर्षके मनसुनी वर्षा लगातार तीन महिनासम अपन प्रभाव जमाइ सेक्ना अनुमान मौसमविद्हुकनके बा ।
मौसमविद् शान्ति कँडेल कठि, “मनसुन सुरु हुइल कुछ समयपाछे मनसुनी वर्षा ब्रेक हुइपरना हो मने यी वर्ष उ डेखाइल नैहो ।’ उहाँक अनुसार कुछ दिनके लाग वर्षा ठ्याम्मे रोक्के आकाश खुल्ना करल विगतके मौसमी प्रवृत्ति डेखैले बा । यी वर्ष मनसुन ‘ब्रेक नहुके’ दोसरे महिनामे उच्याइल बा ।
विगतके वर्षमे हप्ता वा पन्द्र दिनके आसपासमे मनसुन ब्रेक होए । यी वर्ष एक महिनासम फेन वर्षा रुकल नैहो । मौसमविद्से कहलजस्टे एकाध घण्टा घाम झुल्कलेसे फेन मौसममे सुधार हुके चकमन्न घाम नैलागल एक महिना ढेर हुसेकल बा ।
मौसमविद् मीनकुमार अर्यालके अनुसार मौसम पूरे खुल्नासे फेन शुकसे हल्कासे मध्यम वर्षाके अवस्थामे परिणत हुइ । उहाँ कलैं, “हल्का सुधार टे डेखाइठ मने वर्षा रुक्ना सम्भावना कम बा ।’
बह्रटा लडियक सतह
जल तथा मौसम विज्ञान विभागके मौसम पूर्वानुमान महाशाखासे जनाइलअनुसार बिफेक रोज देशभर पूर्ण बदली रहिके धेर स्थानमे भारी वर्षा हुइल बा । विशेषकरके प्रदेश १, बागमती, गण्डकी ओ लुम्बिनी प्रदेशके टमान स्थानमे भारी वर्षा हुइल महाशाखाके अनुसार अभिन कुछ दिन देशके कमे स्थानमे भारी वर्षाके सम्भावना बा । बुधके रातसे बिफेसमके वर्षासे देशके भारी, मझौला ओ छोट लडियाके बहाव उच्च हुइल बा । शुकके प्रदेश १, बागमती प्रदेश, गण्डकी प्रदेश ओ सुदूरपश्चिम प्रदेशके कुछ स्थानमे भारी वर्षाके खतरा कायमे रहल जनैले बा । शनिच्चर फेन यी प्रदेशमे हल्कासे मध्यम वर्षाके क्रम निरन्तर रहना बा ।
बिफेसे कोसी लडिया ओ सहायक लडिया सुनकोसी, भोटेकोसी, तामाकोसी, दूधकोसी, अरुण, तमोर लडियक जल बहाव बह्रल बा । ओस्टेक नारायणी लडिया ओ यकर सहायक लडिया त्रिशूली, बूढीगण्डकी, कालीगण्डकीलगायतके लडियक बहाव उच्च बनके सतर्कता तह पार करेसेक्ना खतरा बह्रल बा ।
तराई जैना लडिया बागमती, कमला, कन्काई, पूर्वी राप्ती, तिनाउ लडिामे उच्च बहाव हुइना हुइल ओरसे सतर्कता अपनैना बाढी पूर्वानुमान शाखाके प्रमुख विक्रम जुवा अनुरोध करलैं ।
पाछेक समय चितवनके माडी ओ नवलपरासीके नवलपुर क्षेत्रमे भारी वर्षा हुइल रेकर्ड हुइल बा । जेकर कारण उ क्षेत्रके स्थानीय लडियामे उच्च बहाव बह्रके गाउँ पेल्ना खतरा रहल ओरसे तटीय क्षेत्रमे सावधानी अपनाइपरनामे जोड डेहल बा ।
