विपन्न गर्भवती, सुत्केरी महिलाहे खाद्यन्न ओ स्वास्थ्य सामग्री हस्तान्तरण

पहुरा समाचारदाता
धनगढी, २६ असार । दलित महिला अधिकार मञ्च नेपाल कैलालीके २ स्थानीय तहहे पोषणयुक्त खाद्यन्न सामग्री तथा कोभिड जोखिम व्यवस्थापनके लाग स्वास्थ्य तथा सरसफाई सुरक्षा सामग्री हस्तान्तरण करले बा ।

मञ्चसे कैलारी गाउँपालिका ओ गौरीगंगा नगरपालिकाके १७१ जाने विपन्न गर्भवती ओ सुत्केरी महिलाहुकनके लाग पोषणयुक्त खाद्यन्न सामग्री तथा १०६ जाने महिला स्वास्थ्य स्वयंसेविकाहुहनहे कोभिड जोखिम व्यवस्थापनके लाग स्वास्थ्य तथा सरसफाई सुरक्षा सामग्री हस्तान्तरण करल हो ।

डिसीएके सहयोगमे दलित महिला अधिकार मञ्च नेपालसे सञ्चालित आधार परियोजना अन्तर्गत कोरोना महामारी ओ लकडाउनके कारण अति विपन्न गरिब तथा सीमान्तकृत समुदायके गर्भवती तथा सुत्केरी महिलाहुक्रे समस्यामे परलओरसे उहाँहुकनहे खाद्य तथा पोषण स्वास्थ्य सुरक्षामे टेवा पुगे कना उद्देश्यसे पोषणयुक्त खाद्यन्न सामग्री हस्तान्तरण करल मञ्च नेपालके अध्यक्ष सावित्रा घिमिरे जानकारी करैली । उहाँ कोरोना महामारीके जोखिम रोकथाम तथा नियन्त्रणके लाग महिला स्वास्थ्य स्वयंसेविकाहुकनहे फेन कोभिड स्वास्थ्य तथा सरसफाई सुरक्षा सामग्री समेत हस्तान्तरण करल बटैली ।

उ सामग्री एक कार्यक्रमके बीच संस्थाके अध्यक्ष सावित्रा घिमिरे कैलारी गाउँपालिका ओ गौरीगंगा नगरपालिकाके जनप्रतिनिधी ओ स्वास्थ्य संस्थाके प्रतिनिधिहुकनहे रोहबरमे संयुक्त रुपमे हस्तान्तरण करले रहि ।

संस्थासे कैलारी गाउँपालिकाके ७१ ओ गौरीगंगा नगरपालिकाके १०० करके १७१ जाने अति विपन्न गर्भवती तथा सुत्केरी महिलाहुकनके लाग हर्लिक्स १७१ पिस, चना १७१ किलो, आलमोण्ड १७१ किलो, स्याम्पु १७१ पिस, थर्मोमिटर १७१ पिस, सेनिटाईजर ५०० एमएलके १७१ पिस, सुजी १७१ किलो, राजमा १७१ किलो, सोयाबिन १७१ प्याकेट, अरहर दाल १७१ किलो, क्यालेण्डर ३४२ पिस, पौष्टिक आहार सम्बन्धी सचेतना पोष्टर १७१ पिस बा ।

अस्टेक, संस्थासे कैलारी गाउँपालिकाके ७४ जाने ओ गौरीगंगा नगरपालिकाके ३२ जाने करके १०६ जाने महिला स्वास्थ्य स्वयंसेविकाहुकनके लाग सेनिटाईजर १०६ पिस, माक्स १०६ प्याकेट, ग्लोब्स १०६ प्याकेट, थर्मलगन १०६ प्याकेट, सेनिटरी प्याड १०६ प्याकेट, टर्चलाईट १०६ पिस, क्यालेण्डर २१२ पिस, पौष्टिक आहार सम्बन्धी सचेतना पोष्टर १०६ पिस स्वास्थ्य ओ सरसफाई सामग्री हस्तान्तरण करल संस्थाके राजेन्द्र रैका जानकारी डेलैं ।

दलित महिला अधिकार मञ्च यीआघे फेन कैलारी गाउँपालिका ओ गौरीगंगा नगरपालिकामे कोभिड जोखिम न्यूनीकरण ओ व्यवस्थापनके लाग टमान वडामे हेण्डवास स्टेशन ओ आईसोलेशन सेन्टरमे टमान कोभिड स्वाथ्य सुरक्षा सामग्री हस्तान्तरण करले बा ।