कञ्चनपुरसे चोरके भारत पुगाइल १२ भैंसीके उद्दार
धनगढी, २७ असार । कञ्चनपुरमे भारतओरसे लैगिल १२ भैसीके उद्दार करल बा । बेल्डाँडी गाउँपालिका–५ के शुक्लाफाँटा राष्ट्रिय निकुञ्ज लग्गे चरैटी रहल अवस्थामे शुकके पाँच जानेक समूहमे आइल भारतीय तस्करसे १३ ठो राँगाभैंसी चोरी करले रहिट ।
उ मन्से १२ ठो भारतीय क्षेत्रसे उद्दार करल सशस्त्र प्रहरी जनैले बा । सशस्त्र प्रहरी बल नेपाल नम्बर ३५ गण शैलेश्वरी मातहतके बिओपी झिलमिलासे सशस्त्र प्रहरी निरीक्षक योगेन्द्र भण्डारीके नेतृत्वमे खटल टोली स्थानीय ओ भारतीय एसएसबीसंगके समन्वयमे शनिच्चर सीमासे झण्डे ८ किलोमिटर दुर भारतके पिलिभितमे फेला पारके नानल बा ।
पिलिभित जिल्लाके टटारगञ्ज ग्राम पञ्चायत शारदा लडियाके धुलिया पलियाघाटमे पुग्टी करेबेर फेला पारके सम्बन्धित व्यक्तिहे बुझाइल सशस्त्र प्रहरी जनैले बा ।
जेम्ने बेल्डाँडी गाउँपालिकाके शंकर थापाके २ भैंसीनिया, नवराज कठायतके एक ठो भैँसीनिया, गोमा रावतके २ भैसा, चन्द्र बहादुर रावतके एक ठो भैसा ओ ४ भैँसी, तेजबहादुर रावतके एक ठो भैँसीनिया ओ १ ठो भैसीनिया बटै ।
स्थानीय शिव उपाध्यायके एक ठो भैसा भर फेला नइपरल सशस्त्र प्रहरीसे जनाइल बा । शुकके शुक्लाफाँटा राष्ट्रिय निकुञ्ज लग्गे सीमा क्षेत्रमे भैँसीनिया चरैटी रहल स्थानीय अरुण उपाध्यायहे डर धम्की डेखाके तस्करके समूहसे भैँसीनिया ओ भैसा चोरके भारतओर लैगिल रहिट ।
