दुर्लभ पाटे बाघके छालासहित २ पक्राउ
धनगढी, ३० असार । कैलालीमे दुुर्लभ पाटे बाघके छालासहित प्रहरी २ जहनहे पक्राउ करले बा ।
सुदूरपश्चिम प्रदेश अनुुसन्धान समूूह (आरआइटी) के टोली मंगर साँझ जिल्लाके गौरीगंगा नगरपालिका–७, मटकौनास्थित सिंहासन सामुदायिक वन क्षेत्रसे पाटे बाघके छालासहित २ जहनहे पक्राउ करल हो ।
पक्राउ परुइयामे कैलालीके मोहन्याल गाउँपालिका–५, सालघारीके पूर्णबहादुुर बुुढामगर ओ लम्कीचुुहा नगरपालिका–१ के लोकेश सिजापति रहल जिल्ला प्रहरी कार्यालय कैलाली जनैले बा ।
करिब १० मिटर लम्बाइके पाटे बाघके छाला बिक्री करटि रहल कना विशेष सूचनाके आधारमे खटल आरआइटीके टोली उहाँहुकनहे पक्राउ करल हो । अब्बे ओइनहे छालासहित आरआईटी इलाका प्रहरी कार्यालय चौमालाके जिम्मा लगैले बा । उ क्षेत्रमे गैल फागुनमे बाघ आतंक मचैले रहे ।
पाटे बाघ आक्रमण करके गौरीगंगा नगरपालिका–५, अन्डैयामे २५ वर्षिया कला धामीके मृत्युु हुइल रहे ।
चौमाला क्षेत्रमे आतंक मचैना बाघहे नियन्त्रणमे लेके डिभिजन वन कार्यालय क्यामेरा ट्रयापिङसमेत करले रहे । मने बाघ नियन्त्रण लेहे सेकल नैरहे ।
अब्बे बरामद हुइल छाला आक्रमण करके महिलाके ज्यान लेहल पाटे बाघके हुइसेक्ना प्रहरी अनुमान करले बा ।
