देउवाके सहयात्री चार मन्त्री
काठमाडौं, ३० असार । सर्वोच्च अदालतके परमादेशसे प्रधामन्त्रीमे नियुक्त हुइल देउवा काँग्रेससे गृहमन्त्रीमे बालकृष्ण खाँण ओ कानुन, न्याय तथा संसदीय मामिला मन्त्रीमा ज्ञानेन्द्रबहादुर कार्कीहे नियुक्त करले बटैं ।
नेकपा माओवादी केन्द्रसे अर्थमन्त्रीमे जनार्दन शर्मा तथा ऊर्जा, जलस्रोत तथा सिँचाइ मन्त्रीमे पम्फा भुषालहे नियुक्त करल बा । काँग्रेस संसदीय दलके प्रमुख सचेतकसमेत रहल खाँण देउवाके विश्वासपात्र मानजिठैं ।
उहाँहे देउवा महत्वपूर्ण मानजैना गृहमन्त्रालयके जिम्मेवारी डेले बटैं । यीआघे माओवादी अध्यक्ष प्रचण्ड नेतृत्वके सरकारमे रक्षामन्त्री हुसेकल खाँण एमालेके नेता माधवकुमार नेपाल नेतृत्वके सरकारमे सिचाइँ मन्त्री बनल रहैं ।
औरे वर्ष स्थानीय ओ प्रतिनिधिसभाके निर्वाचन करहिपरना दायित्व बोकके देउवा नेतृत्वके सरकार प्रशासन ओ प्रहरीके नेतृत्व करेपरना जिम्मेवारी खाँणहे सुम्पले बटैं । यदि देउवा ३० दिनभित्तर संसदसे विश्वासके मत पाइ नैसेकल खण्डमे सांसद स्वतः विघठन हुके ६ महिनाभित्तर मध्यावधी निर्वाचन फेन करेपरना जिम्मेवारी यिहे सरकारहे बा ।
प्रतिनिधिसभा निर्वाचनमे समानुपातिक ओरसे सांसद बनल खाँण नेपाल तरुण दलके पूर्वअध्यक्षसमेत हुइट । २०७० सालके संविधानसभा निर्वाचनमे रुपन्देही ३ मे एमालेके घनश्याम भुषालहे पराजित करल खाँण देउवाके राजनीतिक यात्रामे लग्गेसे साथ डेटिरहल बटैं ।
अस्टेक देउवा कानुन मन्त्रीमे नियुक्त करल ज्ञानेन्द्रबहादुर कार्की यीआघे देउवा नेतृत्वके सरकारमे अर्थमन्त्री हुसेकल बटैं । कार्की अर्थमन्त्री रहलबेला बहुचर्चित एमसीसी सम्झौतामे नेपालके ओरसे हस्ताक्षर करले रहैं । जलस्रोत मन्त्रीसमेत हुसेकल कार्की नेपाल विद्यार्थी संघके केन्द्रीय अध्यक्ष हुइटि काँग्रेसके राजनीतिमे सक्रिय बटैं । उहाँ गैल प्रतिनिधिसभा निर्वाचनमे सुनसरीसे निर्वाचित हुइल हुइट ।
देउवा अर्थमन्त्रीमे नियुक्त करल नेकपा माओवादी केन्द्रके नेता जनार्दन शर्मा टमान चो मन्त्री बन्ना सौभाग्यमानी नेतामे परठैं । २०६४ सालयहोर निरन्तर निर्वाचन जिटल शर्मा माओवादी सेनाके तत्कालीन डेपुटी कमाण्डर हुइट ।
शर्मा शान्ति तथा पुनर्निर्माण, ऊर्जा तथा गृहमन्त्रालयके जिम्मेवारी सम्हारसेक्ले बटैं । शर्मा ऊर्जा मन्त्री रहल बेला लोडसेडिङ अन्त्य हुइलपाछे उहाँहे सफल मन्त्रीके रुपमे लेजाइठ ।
माओवादी केन्द्रके भागसे ऊर्जा, जलस्रोत तथा सिँचाइ मन्त्री बनल पम्फा भुषाल फेन यीआघे मन्त्री हुसेकल बटि । पहिल संविधानसभा ओ गैल संसदीय निर्वाचनमे ललितपुरसे निर्वाचित भुषाल लोकतन्त्र प्राप्तिपाछेक अन्तरिम सरकारमे महिला बालबालिका मन्त्री बनल रहि ।
माओवादी केन्द्रके प्रवक्तासमेत रहल भुषाल भूमिगतकालमे ‘विद्युत’के नामसे परिचित रहि । आहे विद्युत देउवा नेतृत्वके सरकारमे ऊर्जा मन्त्रीके जिम्मेवारी पैले बटि ।
पाँच विपक्षी गठबनधनके समर्थनमे प्रधानमन्त्री बनल देउवा नेतृत्वके सरकारमे नेकपा एमालेके माधवकुमार नेपाल समूह सहभागी नैहुइना जनासेकले बा । अस्टेक गठबन्धनके सहयात्री औरे दल जसपाके उपेन्द्र यादव–बाबुराम भट्टराई पक्ष फेन तत्काल सरकारमे सहभागी नैहुइना डेखाइल बा ।
राष्ट्रिय जनमोर्चा फेन सरकारमे जैनाकि नैजैना कनाबारे निर्णय लेले नैहो । यिहे कारण मन्त्रीपरिषद पूर्णता पैना अभिन कुछ समय लग्ना डेखाइठ । सरकारमे सहभागिता ओ शक्ति बाँडफाँटके विषयमे गठबन्धनमे थप सहमति जुट्ना बाँकी बा ।
