खक्रौलास्थित सशस्त्रके बिओपीमे आगजनी
पहुरा समाचारदाता
टीकापुर, ३१ असार । टीकापुर नगरपालिका–८ खक्रौलास्थित सशस्त्र प्रहरी सीमा सुरक्षा पोष्ट (बिओपी) के निर्माणाधिन भवनमे आगजनी हुइल बा ।
उ निर्माणाधिन भवन हाल बिओपी रहल स्थानसे करिव एक किलोमिटर दुर मोहना लडियाके पार दशगजा लग्गे रहल बा ।
सत्ती भन्सार कार्यालयके जमिनमे अस्थायी रुपमे राखल बिओपीहे सीमा लग्गे सर्ना उद्देश्यसे मोहना लडिया उपार भवन निर्माण हुइटी रहल बा । भवन निर्माणके काम अन्तिम चरणमे पुगल बेला अचानक आगजनी हुइल बा ।
आज सकारे साढे दश बजेक समयमे निर्माणाधिन भवनके भिट्टर पट्कल आवाज आइल कामदार बटैले बाटै । उहाँहुक्रे काम कैना भवन भिट्टर पैठ्नासे आघे नै आगजनी हुइल बिओपीके सई राधेश्याम राना जानकारी डेलै ।
उहाँ आगी नियन्त्रणके प्रयास हुइटी रहल ओरसे उहोर सोधपुछ हुइना बाँकी रहल बटैलै । आगी नियन्त्रणके लागि टीकापुर नगरपालिकाके दमकल पुगल बा । सशस्त्र प्रहरी ओ स्थानीयसे आगी नियन्त्रणके प्रयास हुइटी रहल जनाइल बा ।
