यात्रुवाहक सवारीके भाडा २८ प्रतिशत बह्रल
काठमाडौं, ३१ असार । सरकार यात्रुवाहक सवारीमे २८ प्रतिशत भाडा बह्रैले बा । पहाडी डगरमे चल्ना मालवाहक सवारीमे २० ओ तराईमे सञ्चालन हुइना मालवाहक सवारीमे २६ प्रतिशत भाडा वृद्धि करल यातायात व्यवस्था विभाग जनैले बा ।
सार्वजनिक यातायात सञ्चालनसँग सम्बन्धित लगानी तथा खर्च सम्बन्धमे विभागसे करल बजार अध्ययन, विश्लेषण ओ सरोकारवाला पक्षसँग करल परामर्शअनुसार भाडा वृद्धि करल विभागके कहाइ बा ।
श्रमिकके पारिश्रमिक, इन्धन, टायर, ब्याज, सञ्चालन खर्च ह्रासकट्टी, सञ्चालन मुनाफालगायत मुख्य सूचकमे डेखाइल मूल्यवृद्धिके आधारमे भाडा समायोजन करेपरना सम्बन्धमे असार २७ मे भौतिक पूर्वाधार तथा यातायात मन्त्रालयके मन्त्रीस्तरीय निर्णयसे सहमति प्राप्त हुइल विभाग जनैले बा । पूर्वप्रधानमन्त्री केपी शर्मा ओली नेतृत्वके भौतिकमन्त्री वसन्तकुमार नेम्वाङ अन्तिम समयमे यी निर्णय करल हो । विभागसे पठाइल भाडा समायोजनसम्बन्धी फाइल लम्मा समयसे मन्त्रालयमे रहे ।
साविकके भाडामे २८ प्रतिशत वृद्धि करल विभागके महानिर्देशक नमराज घिमिरे बटैलैं । ‘यी नियम लम्मा तथा मध्यम (अन्तर प्रदेश) रुटमे चल्न सवारीमे लागू हुइ,’ उहाँ कलैं, ‘स्थानीय रुटमे चल्ना सवारीमे भर प्रदेश मन्त्रालयसे भाडा समायोजन करेपरना बा ।’ नेपाल यातायात व्यवसायी राष्ट्रिय महासंघसे बुधके विज्ञप्ति जारी करटि स्थानीय रुटके हकमे प्रदेश मन्त्रालयसे भाडा समायोजन करेपरना संवैधानिक व्यवस्था रहल जनाइल रहे ।
विभागसे समायोजन करल भाडाहे आधार मानके स्थानीयस्तरमे भाडा समायोजनके लाग सम्बन्धित प्रदेश यातायात मन्त्रालयमे निवेदन डेना कहल बा । स्थानीयस्तरके भाडा समायोजनके लाग आवश्यक काम करना जानकारी कराइल फेन विज्ञप्तिमे उल्लेख बा । महासंघ ओ यातायात मजदुर संगठनसे लम्मा समयसे पेट्रोलियम पदार्थके मूल्य बह्राइल कटि भाडा समायोजनके माग करटि आइल रहे ।
