जानकी गाउँपालिका साक्षर पालिका घोषित

पहुरा समाचारदाता
टीकापुर, ३१ असार । कैलालीके जानकी गाउँपालिकाहे साक्षर पालिका घोषणा करल बा । गाउँपालिकाहे एक कार्यक्रमबीच शिक्षा विकास तथा समन्वय एकाइ कैलालीके प्रमुख बैकुण्ठ सुवेदीसे साक्षर पालिका घोषणा करल हुइट । पालिकामे रहल १५ से ६० बरस उमेर समूहके ९५ प्रतिशत नागरिक साक्षर हुइलपाछे गाउँपालिकाहे साक्षर घोषणा करल हो ।

साक्षर पालिकाके लाग राष्ट्रभाषा वा मातृभाषाके वर्णके अक्षरके पढाइ ओ लेखाइ करे सेक्ना, राष्ट्रभाषा वा मातृभाषामे लिखल मूल्यसूची ओ बिलके पढाइ, आपन परिवारके सदस्यके नाउँ, उमेर लेखाइ ओ पढाइ, मोबाइल ओ क्यालकुलेटरके अंक तथा अक्षर चिनके प्रयोग करे जन्ना, शून्यसे नौसमके अंकके अक्षर लेखाइ, एकसे १०० सम संख्या गणना, लेनदेनके हिसाब राख्न लगायतके सूचक रहल बावै ।

पालिकामे रहल सक्कु निरक्षर नागरिक इ सक्कु सूचक पूरा करलपाछे साक्षर घोषणा करल शिक्षा अधिकृत धर्मानन्द कपाडी बटैलै । सरकारसे विसं २०७६ भिट्टर देशके सक्कु जिल्ला नै पूर्ण साक्षर घोषणा कैके नेपालहे नै साक्षर देश घोषणा कैना लक्ष्य राखल रहे । मने नेपालमे कोरोना महामारी फैलल् फेन सक्कु सूचक पूरा कैके फेन घोषणा कार्यक्रममे कुछ ढिलाइ हुइल जनाइल बा ।

कैलालीमे आभिन फेन प्रतिशत नागरिक निरक्षर रहल तथ्यांक रहल बा । शिक्षा विकास तथा समन्वय एकाइके प्रमुख सुवेदी गाउँपालिकासे साक्षर घोषणा कार्यक्रमहे निरन्तरता डेहे पर्ना बटैलै । “घोषणापाछे शैक्षिक गतिविधि निरन्तर करे परठ्, निरक्षर व्यक्ति कोइ बचल वा बसाइसराइँ कैके आइलमे उहाँहुक्रनहे निरक्षर बनैना कार्यमे खटे परल”, सुवेदी कहलै, “निरन्तरता डेना चुनौती बा, यम्ने पालिकासे बजेट विनियोजन कैके काम करे परल, साक्षर किल नैहोके पूर्ण साक्षरता ओर लैजैना गाउँपालिका ध्यान डेहे परल ।”

गाउँपालिकाके अध्यक्ष प्रदीपकुमार चौधरी शिक्षाके विकाससे गाउँपालिकाके अन्य विकासमे फेन सहयोग पुग्ना हुइल ओरसे शिक्षाहे पहिल प्राथमिकतामे राखके काम करटी रहल बटैलै । “गाउँपालिकाके साक्षरता घोषणा कार्यक्रमहे निरन्तरता डेना टमान कार्यक्रम सञ्चालन करजैना बा”, अध्यक्ष चौधरी कहठै, “हम्रे शिक्षामे लगानी कैना कञ्जुस्याइँ नैकरब, इ कार्यक्रम निरन्तर हुइना बा ।”

उपाध्यक्ष उमा महतो गाउँपालिकाहे साक्षर घोषणा कार्यक्रमहे सफल पर्ना सहयोग करुइया सक्कु जनहनहे धन्यवाद डेलै । “सक्कु सक्रिय होके सम्भव हुइल, शिक्षक, विद्यालय, प्रधानाध्यापक, समुदायके नागरिकहे धन्यवाद बा”, उहाँ कहठै, “शिक्षा नै विकासके आधार हो, शिक्षित नागरिकमे श्रम कैना, आयआर्जनसे जोरल हिम्मत आइ, ओहेमारे हम्रे गम्भीर बाटी ।”

राष्ट्रिय शिक्षा प्रारम्भिक कार्यक्रमके कार्यक्रम संयोजक उषा जोशी गाउँपालिकाहे कैलालीके डुसरा साक्षर पालिका घोषणा कैना अपनेहुक्रे सहयोगीके रूपमे रहल बटैली । “साक्षर पालिका घोषणा कार्यक्रमहे सफल पारक लाग हम्रे शैक्षिक नीति ओ योजना निर्माणमे सहयोग करल”, उहाँ कहली ।

गाउँपालिकाहे साक्षर घोषणा कैना गाउँगाउँमे प्रौढ शिक्षा, पह्रक लाग प्रोत्साहन जैसिन कार्य करल रहे । राष्ट्रिय माविके प्रधानाध्यापक प्यारेन्द्र न्यौपाने घोषणा कैके किल नैहोके कार्यान्वयनमे समेत ध्यान डेहे पर्ना बटैलै ।