कैलालीमे सावन ११ गतेसम निषेधाज्ञा थप
पहुरा समाचारदाता
धनगढी, १ सावन । कैलालीमे कुछ खुकुलो बनैटि निषेधाज्ञा थप करगिल बा । जिल्ला कोभिड संकट व्यवस्थापन केन्द्रके सिफारिसके आधारमे प्रमुख जिल्ला अधिकारी खगेन्द्रप्रसाद रिजाल लगभग तीन महिनासे बन्द रहल सिनेमे हल, पार्टी प्यालेस, डान्सबार, सभासम्मेलन, खेलकुद लगायत मनैन्के ढेर भीडभाड हुइना क्षेत्र बाहेकके व्यापार व्यवसाय स्वास्थ्य सुरक्षाके मापदण्ड अपनाके बिहान ५ से रात ८ बजेसम सञ्चालन करे पैना आदेश करले बटैं ।
आज (शुकके) जारी करल आदेशमे सावन ११ गतेसम जिल्लाभर निषेधाज्ञा जारी रहना उल्लेख करल बा । यी अवधिमे मनैन्के ढेर भीडभाड हुइना शिक्षण संस्था, पुुस्तकालय, जिम खाना, नाचघर लगायतके स्थल भर तत्काल सञ्चालन करे नैपैना आदेश करल बा ।
अत्यावश्यक कामसे जिल्ला प्रवेश करना ओ बाहेर जैना सवारीसाधन स्वास्थ्य सुरक्षाके मापदण्ड अपनाके चले डेना, सार्वजनिक तथा निजी सवारीसाधन सञ्चालन करै पैना फेन स्थानीय प्रशासन जनैले बा ।
जिल्लामे कोरोना भाइरसके संक्रमणके जोखिम कायमे रहल ओरसे स्वास्थ्य सुरक्षाके मापदण्ड अनिवार्य रुपमे पालना करना समेत आग्रह करल बा ।
