खप्तड मालिका यातायात प्रालिके बस काउन्टर टुरगैल

धनगढी, ३ सावन । जिल्ला अदालत कैलालीके आदेशके अवज्ञा करटि धनगढी उपमहानगरपालिका धनगढीमे रहल खप्तड मालिका यातायात प्रालिके बस काउन्टर टुरले बा ।

कैलाली जिल्ला अदालतसे यिहे वैशाख १३ गते खप्तड मालिका यातायात प्रालिके विवादित दुनु पक्षहे छलफल कराके निर्णयमे पुग्न आदेश जारी करलेसे फेन धनगढी उपमहानगरपालिका शनिच्चरके रोज विवादित दुनु पक्ष बीच छलफल ओ सहमति बिने अदालतके आदेशके अवज्ञा करटि खप्तड मालिका यातायात प्रालिके टिकेट काउन्टर टुरल हो ।

प्रालिके पदाधिकारीहुक्रे शेयर सदस्य अनन्तराज जोशी समूह ओ दिलबहादुर खलौला समूह बीच बस टिकट काउन्टरके विषयमे विवाद हुइटेहे ।

खप्तड मालिका यातायात प्रालिके विवादके बीच शेयर सदस्य अनन्तराज जोशी समूह औरे यातायात प्रालि खप्तड यातायात प्रालि दर्ता करके धनगढी बसपार्कस्थित खप्तड मालिका यातायात प्रालिके टिकट काउन्टर खप्तड यातायात प्रालि पाइ परना माग ढरटि आइल बा । कलेसे, खप्तड मालिका यातायात प्रालिके अध्यक्ष दिलबहादुर खलौला समूह उ टिकेट काउन्टर विगतसे फेन खप्तड मालिका यातायातके रहल, अब्बे फेन नियम संगत अप्नेहुक्रे प्रयोग करे पाए परना ओ औरे संस्था आके अपन कार्यालय अर्थात् टिकेट काउन्टरमे भाग मग्ना लज्जास्पद रहल बटैटि आइल ओरसे विवाद अदालतसम पुगल रहे ।

यहोर जिल्ला अदालत कैलाली, यातायात व्यवस्था कार्यालय ओ कम्पनी रजिस्टारके कार्यालय फेन धनगढी बसपार्कस्थित रहल खप्तड मालिका यातायात प्रालिके टिकेट काउन्टरसे विगतसे खप्तड मालिका यातायात प्रालि अपन कामकाज सञ्चालन करटि आएल ओ अब्बे फेन उहाँ खप्तड मालिका यातायात प्रालिके हक रहल कटि खप्तड यातायात प्रालिके अनन्तराज जोशी समूह तथा धनगढी उपमहानगरपालिकाके कार्यालय ओ नगरप्रमुख नृपबहादुर वडहे जानकारी करैले रहे ।

यिहेबीच बस टिकट काउन्टरके विषयमे विवाद हुइटिरहल ओरसे औरे व्यवस्था नैहुइटसम बन्द करना धनगढी उपमहानगरपालिका फेन गैल वैशाख १४ गते सिफारिस करले रहे ।

यद्यपि अब्बे भर उपमहानगरपालिका सक्कु सरोकारवाला निकाय ओ जिल्ला अदालत कैलालीके आदेश नैमानके विवादित दुनु पक्ष बीच छलफल ओ सहमति बिना कराइल शनिच्चरके खप्तड मालिका यातायात प्रालिके टिकेट काउन्टर टुरले बा ।