६ महिना नैपुग्टि भस्केलागल धनगढीक् कालोपत्रे सडक
धनगढी, ३ साउन । धनगढीके ढुंगेबजार–हनुमान मन्दिर–यातायात कार्यालय हुइटि तारानगर पुग्ना नालीसहितके कालोपत्रे सडक निर्माण हुइल ६ महिना नैपुग्टि भस्के लागल बा ।
सडक निर्माणके लाग २०७४ फागुनमे निर्माण सम्झौता रहे । ३ किलोमिटर ३८४ मिटर लम्मा सडकसहित दुनुओर नाली निर्माणके लाग लामा–खड्का–कृष्ण जेभीसँग सघन सहरी विकासअन्तर्गत ठेक्का सम्झौता करल रहे । मने, विद्युतके पोल नालीके बीच भागमे ढरके निर्माण करगिल । अइसिक निर्माण करलपाछे पानीके निकास रुकल बा ।
सडक हस्तान्तरण करल ६ महिना नैपुग्टि सडकके बीच भाग किल नैहुके सडक दायाँबायाँ भस्कन सुरु हुइल स्थानीयके गुनासो बा । कमसल सामग्री प्रयोग करके नाली ओ सडक निर्माण हुइल स्थानीयके आंशका बा । तारानगरमे निर्माण करल नालीमे पानी निकास नैहुइना मेरिक निर्माण करल तारानगरके स्थानीय गीतादेवी शर्मा बटैली ।
‘नालीके बीच भागमे विद्युतके पोल ढरके नाली निर्माण करल बा, यी मापदण्डविपरित हो । नाली बनाइल बा मने पानी निकास नैहुइठ,’ उहाँ गुनासो करलि, ‘अइसिन कौनो काम नैलग्ना नाली बनाके पैसा कुम्ल्यइनासे बरु पहिले ठिक रहे ।’
सडकसहित नाली निर्माणके जिम्मा पाइल लामा–खड्का–कृष्ण जेभी सब निर्माण सम्पन्न हुइल कटि २०७७ माघ महिनामे उ सडक धनगढी उपमहानगरपालिकाहे हस्तान्तरण करले रहे । मने, सडक हस्तान्तरण करल ६ महिना नैपुग्टि सडकके बीच भाग फुटे लागल बा कलेसे सडक दायाँबायाँ भस्के लागल बा । ७ मिटर चौडाई सडक कालोपत्रे करेपरनामे निर्माण कम्पनी कहुँ ५ कहुँ साढे ५ टे कहुँ कालोपत्रे नैकरके निर्माण सम्पन्न हुइल कटि भुक्तानी लेसेकले बा । सडक टुटफुट हुइल टमान स्थानसे गुनासो आइल संघीय आयोजना कार्यान्वयन इकाई धनगढीके आयोजना प्रमुख प्रविन शाह बटैलैं ।
सम्बन्धित निर्माण कम्पनीहे एक वर्ष नैपुग्टि टुटफुट हुइल तथा भस्कल पूर्वाधारके पुनः निर्माणके लाग पत्राचार करसेकल आयोजना प्रमुख शाह जानकारी करैलैं । लामा–खड्का–कृष्ण जेभी सघन सहरी विकास अन्तर्गत धनगढीमे १७ ठो सडक निर्माण करके ८२ करोड रुपैयाँ भुक्तानी लेसेक्ले बा । ४२ किलोमिटर सडक निर्माण करल कटि उ कम्पनी भुक्तानी लेसेकलेसे फेन निर्माण करल अधिकांश सडक भस्के लागल बा । निर्माण सम्पन्न हुइल सडक हस्तान्तरण करल एक वर्षभित्तर टुटफुट हुइ वा भस्कलेसे सम्बन्धित निर्माण कम्पनी निर्माणके जिम्मेवारी लेहेपरना व्यवस्था बा ।
निर्माण सम्पन्न हुइल एक वर्ष नैपुग्टि भस्कल सडकके पुनःनिर्माणके लाग संघीय आयोजना कार्यान्वयन इकाइसे पत्राचार करलेसे फेन कौनो काम हुइ सेकल नैहो । मने, लामा–खड्का–कृष्ण जेभीके प्रतिनिधि दीपक डिसी आयोजना कार्यालयसे टुटफुट तथा भस्कल बिग्रल सडक पुनःनिर्माणके लाग पत्र आइल ओरसे हलि मर्मत सम्भार करना दाबी करले बटैं ।
सहरी विकास तथा भवन निर्माण विभाग संघीय आयोजना कार्यान्वयन इकाई धनगढीसे सघन सहरी विकास कार्यक्रमअन्तर्गत धनगढी उपमहानगरपालिकाभित्तर ८२ करोड रुपैयाँ खर्च करके निर्माण करल १७ सडकमध्ये अधिकांश सडक निर्माण पूरा नैहुके काम नैलग्ना हुइलओरसे आयोजना कार्यालयसे ओइसिन सडकके मर्मत हुइ सेकल नैहो ।
