कोरोना विरुद्धके अमेरिकी खोप लगैना शुरु
प्रधानमन्त्रीसे उदघाटन
काठमाडौं, ४ सावन । प्रधानमन्त्री शेरबहादुर देउवा अमेरिकासे अनुदान प्राप्त कोरोनाविरुद्धके खोप लगैना कार्यके जोरपाटीसे शुभारम्भ करले बाटै ।
जोरपाटीस्थित खगेन्द्र नवजीवन केन्द्रमे स्वास्थ्यकर्मीहे खोप हस्तान्तरण कैके शुभारम्भ करल हुइट । उ कार्यक्रममे नेपालके लाग अमेरिकी राजदूत र्याण्डी बेरी फेन सहभागी रहल रहिट ।
अमेरिकासे जोन्सन एण्ड जोन्सन कम्पनीके १५ लाख ३४ हजार ८५० डोज खोप नेपालहे उपहार स्वरुप डेहल रहे । इ खोप एक डोज किल लगैले पुगठ् । उक्त खोप सोम्मारसे ५० से ५४ बरस उमेर समूहके व्यक्ति, अपांगताके क ओ ख वर्गके परिचयपत्र पाइल व्यक्ति, नेपालमे बसोबास करटी रहल शरणार्थी, सफाइकर्मी लगायतहे डेना सुरु करल स्वास्थ्य मन्त्रालय जनैले बा ।
काठमाडौंमे ४४ ठो खोप केन्द्रसे सावन ४ गतेसे ६ गतेसम जोन्सन एण्ड जोन्सन कम्पनीके कोरोना खोप लगैना निर्णय इहीसे आघे नै सरकारसे करसेकल बा ।
