नेकाके नेता कार्यकर्ता भेटघाट तथा पार्टी प्रवेश कार्यक्रम
पहुरा समाचारदाता
हसुलिया, ४ सावन । कैलारी गाउँपालिका वडा नम्बर ३ टिसिएनमे मंगरके रोज नेपाली काँग्रेसके नेता कार्यकर्ता भेटघाट तथा पार्टी प्रवेश कार्यक्रम हुइल बा ।
नेपाली काँग्रेस कैलारी गाउँपालिका वडा नम्बर ३ के सभापति विजय चौधरीके अध्यक्षतामे हुइल कार्यक्रममे वडका पहुना पार्टीके जिल्ला उपसभापति प्रकाश वम रहल रहिट । नेता कार्यकर्ता भेटघाट तथा पार्टी प्रवेश कार्यक्रममे विशिष्ट पहुनामे क्षेत्रीय सभापति खेमराम चौधरी, महासमिति सदस्य पुरन चौधरी रहल रहिट ।
ओस्टेक पहुनामे महाधिवेशन प्रतिनिधि भरतराम चौधरी, पूर्व जिल्ला सचिव रामचरण चौधरी, कैलारी गाउँपालिकाके अध्यक्षके उम्मेदवार राजसमझ चौधरी, कैलारी गाउँपालिकाके सभापति कृष्ण चौधरी लगायत कार्यकर्ता हुकनके सहभागिता रहल रहे ।
कार्यक्रममे एमालेके स्थायी समिति संगठन विस्तार सदस्य अइटवारी चौधरी लगायत १० जाने नेपाली काँग्रेसमे प्रवेश करल रहिट । कार्यक्रमके संचालन रमेश चौधरी, स्वागत मन्तव्य विष्णुकुमारी चौधरी करले रहिट, कलेसे आठ बरषके चर्चु थारुफे अपन बाट राखल रहिट ।
