सुदूरपश्चिममे लागूऔषध प्रयोगकर्ताके संख्या बृद्धि

धनगढी, ५ सावन । सुदूरपश्चिम प्रदेशमे लागूऔषध प्रयोगकर्ताके संख्यामे बृद्धि हुइटि गैल बा । बिगत ११ महिनाके अवधिमे ३ सय ४३ जाने लागुऔषध प्रयोगकर्ता पक्राउ परल बटैं ।

प्रदेश प्रहरी कार्यालय डोटीके तथ्यांकअनुसार आर्थिक वर्ष २०७७/०७८ के ११ महिनामे ३ सय १९ पुरुष, १५ महिला ओ ९ जाने भारतीय नागरिक करके ३ सय ४३ जाने लागुऔषध प्रयोगकर्ता पक्राउ परल हुइँट् ।

सबसे ढेर कञ्चनपुरमे १९६ ओ कैलालीमे १२७ जाने पक्राउ परल बटैं । अस्टेक, दार्चुला ओ बैतडीमे ५÷५, बाजुरामे ४, बझाङमे ३, डोटीमे २ ओ अछाममे १ जाने पक्राउ परल बटैं । डडेल्धुरामे भर कोइ पक्राउ नैपरल प्रदेश प्रहरी कार्यालय जनैले बा ।

प्रयोगकर्तामे १६/१७ वर्षके उमेर समूहके युवा ढेर रहल प्रदेश प्रहरी कार्यालयके प्रवक्ता तथा प्रहरी नायव उपरीक्षक भरतबहादुर चौधरी बटैलैं । प्रदेश प्रहरीके तथ्यांकअनुसार २ सय २१ मुद्दा लागूऔषध सम्बन्धीके बा ।

लागूऔषध प्रयोगकर्ताहुकनहे प्रहरी पक्राउ करके मुद्दा चलैटि आइल बा । मने कारोबारीहुकनहे भर प्रहरी पक्राउ करे सेकल नैहो । मने, जिल्ला प्रहरी कार्यालय कञ्चनपुरके प्रवक्ता प्रहरी नायव उपरीक्षक शिद्धराज न्यौपाने कारोबारी ओ प्रयोगकर्ता एक्के रहल बटैलैं ।

लागूऔषध रोकथामके लाग टमान संघसंस्था तथा प्रहरीसे जनचेतनामूलक कार्यक्रम करटि अइलेसे फेन सीमावर्ती भारतीय बजारसे ब्राउन सुगर ओ ट्याबलेटके ओसारपसार बह्रना क्रममे रहल ओरसे रोकथाममे चुनौति थपल प्रहरीके कहाइ बा ।