नेपालसे रावलहे राजीनामा फिर्ता लेना आग्रह

काठमाडौं, ७ सावन । नेकपा एमालेके वरिष्ठ नेता माधवकुमार नेपाल उपाध्यक्ष डा. भीम रावलहे राजीनामा फिर्ता लेना आग्रह करले बटैं । बुधके साँझ रावल निवास टोखा पुगके नेता नेपाल उ आग्रह करल हुइँट् ।

‘उहाँ (माधव नेपाल) भेटमे भीमजीहे राजीनामा फिर्ता लेहेक कलैं, चित्त नैबुझल बाट आपसी छलफल करके सुल्झाइ सेक्ना बटैलैं,’ बैठकमे सहभागी एक नेता कलैं ।

करिब २ घण्टाके बाटचितमे पार्टीभित्तरके समस्याके बारेमे छलफल हुइल बुझगिल बा ।

अँट्वार प्रधानमन्त्री शेरबहादुर देउवासे विश्वासके मत लेना आघे रावल प्रतिनिधि सभा सदस्य पदसे राजीनामा घोषणा करले रहैं । रावलसे बुझाइल राजीनामाके पत्र अभिन संघीय संसद सचिवालयमे विचाराधीन बा । रावल टबसे नेपाल पक्षके बैठकमे गैल नैहुइट् ।