नैडराइ परि, सिस्टम सुरक्षित बाः नेपाल राष्ट्र बैंक
काठमाडौं, ७ सावन । नेपाल राष्ट्र बैंकसहित १५ बैंकके बैंकिङ सिस्टम ह्याक करना चेतावनी आइल बा । बुधके साँझ राष्ट्र बैंकके प्रवक्ता, सहप्रवक्ता तथा टमान बैंकके उच्च अधिकारीहे चेतावनीपूर्ण इमेल आइल बटागिल बा ।
बुधके साँझ इमेल अइलेसे फेन बिफेक बिहान सिस्टम ह्याक करके रकम निकरना म्यासेज आइल राष्ट्र बैंकके बैंक तथा वित्तीय संस्था नियमन विभागके प्रमुख एवं प्रवक्ता देवकुमार ढकाल जानकारी डेलैं । उहाँ अनुसार अपने ह्याकर बटुइया समूह राष्ट्र बैंकसहित १५ वाणिज्य बैंकके सिस्टम ह्याक करके रकम निकरना म्यासेज भाइबर ओ म्यासेन्जरमे प्राप्त हुइल रहे ।
‘महिन भाइबर ओ म्यासेन्जरमे अइसिन म्यासेज प्राप्त हुइल रहे, हम्रे हमार (नेपाल राष्ट्र बैंक) ओ बैंकके सिस्टम चेक करलि, हमार सिस्टम सुरक्षित बा, ह्याक हुइल नैहो, डराइ परना अवस्था नैहो,’ उहाँ कलैं, ‘यी कार्य कानुनी रूपमे दण्डनीय हो, ओइनके उप्पर कारबाही हुइ ।’
उहाँक अनुसार इमेल ओ कल करुइया व्यक्तिके विषयमे थप अनुसन्धान हुइटा, मने के ओइसिन म्यासेज पठाइल कना विषयमे हालसम कुछ खुलल नैहो । कोइ धम्क्यैना प्रयोजनके लाग फेन उ इमेल ओ फोन करल हुइ सेक्न आशंका करल बैंकके अधिकारीहुक्रे बटैठैं ।
ह्याकरसे पठाइल कहल म्यासेजमे नेपाल राष्ट्र बैंक, कुमारी बैंक, नेपाल बैंक, नबिल बैंक, राष्ट्रिय वाणिज्य बैंक, माछापुच्छ«े बैंक, एनएमबि बैंक, एनआइसी एशिया बैंक, बैंक अफ काठमाण्डू, सिटिजन्स बैंक इन्टरनेसनल, सानिमा बैंक, नेपाल एसबिआई, एभरेष्ट, नेपाल इन्भेष्टमेन्ट ओ हिमालय बैंकके नाम उल्लेख करके उ बैंकके सिस्टम ह्याक करके रकम निकरना चेतावनी डेहल रहे ।
