एमाले केन्द्रीय कमिटी बैठक ओराइल, कारबाहीके निर्णय नैहुइल
काठमाडौं, ८ सावन । चार दिनसे जारी नेकपा एमालेके केन्द्रीय कमिटी बैठक बिफके रोज ओराइल बा ।
बैठक प्रधानमन्त्री शेरबहादुर देउवाहे प्रधानमन्त्री बनैना हस्ताक्षर करना ओ विश्वासके मत डेना सांसदहे कारबाहीके निर्णय नैकरल ।
बुधके २४ घण्टे स्पष्टीकरण माग करटि पत्र पठाइलपाछे नेपाल पक्ष समयमे ओकर जवाफ डेसेकले बा । दिनके २ बजेसम स्पष्टीकरणके जवाफ कुर्न ओ ३ बजे बैठना केन्द्रीय कमिटी बैठकसे उहाँहुकनहे कारबाही करना तयारी रहे । मने एकताके लाग अधिकतम प्रयास करना कटि बैठक ओराइल पार्टी प्रवक्ता प्रदीप ज्ञवाली बटैलैं ।
‘स्पष्टीकरण अइना क्रममे बा, उ हेरके करना कना निर्णय हुइ’, ज्ञवाली कलैं, ’मने उहिनसे फेन आघे हम्रे जोन छलफल चलाइटि, उ छलफलले धेर बाट निर्धारण करठ ।’
दुनु पक्षबीच एकताके लाग अनौपचारिक छलफल चलटिरहद ओरसे कारबाही करलेसे बिग्रे सेक्ना हुइल ओरसे कारबाहीके निर्णय रोकल हो ।
बैठकआघे हुइल पुष्पलाल स्मृति दिवसके कार्यक्रममे अध्यक्ष केपी शर्मा ओली सबहे एकताके लाग आव्हान करटि माधव समूह यीआघे करल गल्तीमे माफी डेना बटैले रहैं ।
तुल्सीलाल स्मृति प्रतिष्ठानमे केन्द्रीय कमिटी बैठक सावन ४ गतेसे सुरु हुइल हो । बैठकमे नेपाल पक्ष भर सहभागी हुइल नैरहे ।
