ब्रम्हदेवमे बर्थिङ सेन्टर सञ्चालन

कञ्चनपुर, ८ सावन । जिल्लाके भीमदत्त नगरपालिका–९, ब्रम्हदेवमे चौबिसै घन्टा बर्थिङ सेन्टर सञ्चालनमे आइल बा । बर्थिङ सेन्टर सञ्चालनमे आइलबाड स्थानीयवासी महिलाहे भारतीय निकटवर्ती बजारके अस्पतालमे प्रसूतिके लाग जाइपरना झन्झट ओराइल बा ।

गाँउहिमे बर्थिङ सेन्टर सञ्चालन हुइलपाछे महिलाहे सुरक्षित रुपमे प्रसूति हुइक लाग सहज हुइल हो । प्रसूति सेवाके लाग नगरपालिकासे औषधि, आवश्यक औजार ओ उपकरणसहित दक्ष जनशक्तिके बर्थिङ सेन्टरमे व्यवस्था मिलैले बा ।

गाउँमे बर्थिङ सेन्टर नैहँके प्रसूति सेवाके लाग महिलाहे घरपरिवार साइकल ओ मोटरसाइकलमे बोकके भारतीय निकटवर्ती टनकपुरस्थित अस्पतालमे पुगाइल स्थानीयवासी अनिता बुढा बटैली, उहाँ कलि, “सीमा क्षेत्रमे तैनाथ भारतीय सुरक्षाकर्मीके खप्की खाइपरना औरे बाध्यता रहे ।’

अस्पतालमे ढेर शुःल्कसमेत लेहल उहाँ बटैलि । अस्पताल पुगैना ढिला हुके ज्यान जैना जोखिमसमेत रहे । बर्थिङ सेन्टर सञ्चालनमे आइलसँगे उ सब समस्या हटल उहाँ बटैलि ।

नगरप्रमुख सुरेन्द्र विष्ट बर्थिङ सेन्टरसे खल्लामछेट्टी, टुँडिखेल, सन्तनगर, ब्रम्हदेव, तिलकेनीसहितके बासिन्दा सहज रुपमे सेवा पैना जानकारी डेलैं । “सीमावर्ती क्षेत्रके बासिन्दा विगतमे भारतके अस्पतालमे सेवा लेहेक लाग जाइपरे,’ उहाँ कलैं, ‘आब भारतीय छिमेकी शहर टनकपुरके बासिन्दा समेत बर्थिङ सेन्टरसे लाभ लेहे सेक्हि ।’

बर्थिङ सेन्टर सञ्चालनसँगे दुर्गम क्षेत्रके जनताके स्वास्थ्य सेवामे पहुँच बह्रल बा । शहरी स्वास्थ्य केन्द्र व्यवस्थापन करके नगरपालिकासे प्रसूति सेवा सञ्चालन करले बा ।