टोकियो ओलम्पिकः मीराबाई चानू भारतहे डेली पहिल पदक
काठमाडौं, ९ सावन । मीराबाई चानू भारतहे टोकियो ओलम्पिक–२०२० मे पहिल पदक डेहवैले बटि । भारोत्तोलनके ४९ किलोग्रामओरके स्पर्धामे चानू भारतहे रजत पदक जिटैलि ।
भारत ओलम्पिकमे भारोत्तोलनमे पहिलचो रजत पदक जिटल हो । यी स्पर्धामे चीनके होउ जुहई स्वर्ण ओ इन्डोनेसियाके विन्डी असाह कांस्य पदक जिट्ली ।
चानू २०२ किलोग्राम तौल उठाके भारतहे रजत पदक डेली । स्वर्ण पदक विजो जुहई २१० किलोग्राम तौल उठैले रहि । भारतहे टोकियो ओलम्पिक–२०२० मे पहिलचो डेना सफल चानूहे भारतीय राष्ट्रपति रामनाथ कोविन्द ओ प्रधानमन्त्री नरेन्द्र मोदी बधाई डेले बटैं ।
ओस्टेक इरानके सुटर जवाद फोरोघी १० मिटर एअर पिस्तोलमे स्वर्ण पदक जिटैले बटैं । ४१ वर्षिय फोरोघी इरानके लाग ओलम्पिकमे पदक डेहुइया सबसे ढेर उमेरके खेलाडी हुइट । यीआघे सन् १९५६ मे मेलबर्नमे हुइल खेलमे ३८ वर्षिय महमुद नाम्जौ कांस्य पदक डेहवैले रहैं ।
जारी ओलम्पिकमे अभिनसम २ स्वर्ण ओ १ कांस्यसहित चीन पहिल स्थानमे बा ।
