सोम्मारसे मनसुन सक्रिय हुइना
पहुरा समाचारदाता
धनगढी,१० सावन । सोम्मारसे मनसुन सक्रिय हुके देशभर सामान्यसे पूर्ण बदली रहिके अधिकांश स्थानमे हल्कासे मध्यम वर्षा हुइना बा । मनसुन न्यूनचापीय रेखा नेपालके तराई भूभाग लग्गे विस्तारे अइना क्रम शुरु हुइल ओरसे सोम्मारसे मनसुन सक्रिय हुके देशके अधिकांश स्थानमे वर्षाके सम्भावना रहल वरिष्ठ मौसमविद् वरुण पौडेल बटैलै ।
आज रातसम उ रेखा नेपालके तराई भू–भागसम आपुग्ना सम्भावना रहल ओरसे मनसुन सक्रियहुके बुधसम वर्षा हुइना सम्भावना डेखल हो, मौसमविद् पौडेल कहलै । जल तथा मौसम विज्ञान विभागसे अइना २४ घण्टाके लाग चेतावनी तथा परामर्श जारी करटी देशभर कुछ स्थानमे हल्कासे मध्यम वर्षा तथा वाग्मती प्रदेशके एक–दुई स्थानमे भारी वर्षाके सम्भावना रहल जनैले बा ।
विभागसे पहाडी भू–भागमे भूक्षय, पहिरो तथा गेग्रान बहावके जोखिम रहल ओरसे नदीनाला ओ खहरे खोलामे पानीके सतह बढे सेक्ना ओरसे आवश्यक सतर्कता अपनैना अनुरोध करले बा ।
हाल देशभर सामान्य बडरी हुके प्रदेश नं १, वाग्मती ओ गण्डकी प्रदेशके कुछ स्थानमे हल्का वर्षा हुइटी रहल बा । विभागके अनुसार रात देशभर सामान्यसे पूर्ण बदली रहिके ढेर जैसिन स्थानमे हल्कासे मध्यम वर्षाके साथे वाग्मती, गण्डकी, लुम्बिनी ओ सुदूरपश्चिम प्रदेशके एक– दुई स्थानमे भारी वर्षाके सम्भावना रहल बा । सोम्मार देशभर सामान्यतया बडरी रहिके ढेर स्थानमे हल्कासे मध्यम वर्षाके सम्भावना रहल बताइल बा ।
