१३ औं साफ च्याम्पियनसिप नेपालमे कैना प्रस्ताव
काठमाडौ, १० सावन । दक्षिण एसियाके सबसे भारी फुटबल प्रतियोगिता साफ च्याम्पियनसिप आयोजना कैना नेपालहे आधिकारिक प्रस्ताव आइल बा ।
साफके १३ औं संस्करण अइना अक्टोबरमे कैना सदस्य राष्ट्र सहमति हुसेकल बा । ओकर लाग आयोजकके आधिकारिक प्रस्ताव आइल अखिल नेपाल फुटबल संघ एन्फा जनैले बा ।
शुकके बैठल साफके जुम बैठकमे साफ च्याम्पियनसिप अक्टोबरमे कैना सहमति हुइल रहे । मने आयोजकके विषयमे टुंगो लागे नइसेकल रहे । यी आघे बंगलादेश साफ आयोजना कैना कहलेसेफे बढटी कोरोना संक्रमणके कारण आयोजना करे नइसेक्ना जानकारी डेहल रहे । उ पाछे साफ नेपाल, भारत ओ माल्दिभ्स साफ आयोजनामे इच्छा डेखाइल ओ अगष्ट पहिल साता आयोजकके टुंगो लग्ना जनैले रहे ।
साफ महासचिव अनवरुल हक एन्फा महासचिव इन्द्रमान तुलाधरहे साफ च्याम्पियन आयोजनाके प्रस्ताव पठाइल एन्फा जनैले बा । एन्फा महासचिव तुलाधर अब एन्फासे साफ च्याम्पियनसिपके लाग विस्तृत प्रस्ताव बनाके स्वीकृतिके लाग साफमे पठैना बटैले बटैले ।
एन्फाके प्रस्तावहे अध्ययन करके साफ आयोजनाके अन्तिम निर्णय भर साफ अध्यक्ष ओ साफ कार्यसमितिसे करुइया एन्फा बताइल बा ।
साफ च्याम्पियनसिपमे यी चो ५ टिम केल खेल्न लगभग पक्का बा । पाकिस्तान फिफाके प्रतिबन्धमे रहल ओरसे साफ खेल्न नइहो । ओस्टेक भुटान कोभिड–१९ के कारण देशबाहेर जैना प्रतिबन्ध रहल कारण सहभागिता नइजनाजाई । आब नेपालसंगे बंगलादेश, भारत, माल्दिभ्स ओ श्रीलंका केल साफमे सहभागिता जनैही ।
नेपालमे यी आघे सन् १९९७ ओ २०१३ मे साफ च्याम्पियनसिप आयोजना हुइल रहे । नेपाल अभिनसम साफके फाइनल पुगे नइसेकल । यी चो फाइनल पुग्टी उपाधि जित्न लक्ष्य राखल नेपाल बन्द प्रशिक्षण शुरु करसेकल बा ।
मने अँटवार नेपालके मुख्य प्रशिक्षक अबुदुल्लाह अलमुताइरी भर राजीनामा डेना घोषणा करले बटै ।
