निशेषज्ञा सावन २१ गतेसम निरन्तरता
पहुरा समाचारदाता
धनगढी, ११ सावन । जिल्ला प्रशासन कार्यालय कैलाली जारी निशेषज्ञाहे ठप परिमार्जन करटी सावन २१ गतेसम कैलाली जिल्ला भर लागु हुइना करके निरन्तरता डेले बा ।
सोम्मारके रोज प्रकाशित प्रमुख जिल्ला अधिकारी खगेन्द्रप्रसाद रिजालसे हस्ताक्षरित विज्ञप्तीमे पुर्व निर्धारित टमान निकायके लिखित तथा प्रयोगात्मक परीक्षा संचालन करेबेर हल तथा कोठाके आकार अनुसार २५ जानेसे ढेर मनै भेला जमा नइहुइना करके परीक्षा संचालन कैना, एक सिफट्टके सक्कु परीक्षार्थी बाहेर हुइलपाछे केल दुसर सिफट्टके परीक्षार्थीहुकनहे प्रवेश करे मिल्ना करके फरक समय राखे पर्ना, परीक्षा संचालनके क्रममे जनस्वास्थ्यके मापदण्डके अनिवार्य पालना करके मास्क तथा स्यानीटाइजरके उचित प्रयोग कैनाके साथे प्रत्येक सिफट्टमे परीक्षा हल अनिवार्य रुपमे स्यानीटाइज करे पर्ना कहल बा ।
परीक्षार्थीहुक्रे हलमे प्रवेश कैना आघे ओ परीक्षा ओराइलपाछे नेपाल सरकारसे तोकल मापदण्ड बमोजिम भौतिक दुरी कायम हुइना व्यवस्था मिलैना कहल बा । गोष्ठी, तालिम, सेमिनार, बैठक, समिक्षा, प्रशिक्षण जैसिन क्रियाकलाप संचालन करेबेर भर्चुअल माध्यमसे कैना, भौतिक रुपमे उपस्थिति हुके करे परलेसे ढेरमे २५ जाने सहभागी रहना करके जनस्वास्थ्यके मापदण्डके पूर्ण परिपालना कैना करके संचालन कैना कहल बा ।
घरसे बाहेर निक्रेबेर अनिपवार्य रुपमे दुई व्यक्तिविच दुई मिटरके भौतिक दुरी कायम रख्ना ओ अनिवार्य रुपमे मास्कके प्रयोग कैना कहल बा ।
त्रिभुवन विश्वविद्यालय, लोक सेवा आयोग लगायतके निकायसे परीक्षाके कार्यक्रम सार्वजनिक हुइल ओरसे देशके टमान भागसे परीक्षाके आवागमन समेतहे दृष्टिगत करके जनस्वास्थ्यके मापदण्डके पूर्ण पालन हुइना करके मध्यम तथा नम्मा दुरीके सार्वजनिक यातायात संचालन करे सेक्ना कहल बा ।
मध्यम तथा नम्मा दुरीके सवारी साधनके हकमे उक्त सवारी साधनमे सवार हुके जैना सक्कु यात्रुहुक्रे नाउ तथा सम्पर्क नम्बर सहितके चलानी तयार करके प्रस्थानविन्दु तथा गन्तव्यस्थलके ट्राफिक प्रहरी पोष्टमे अनिवार्य रुपमे बुझाई पर्ना बा । यी आदेशके लल्लंघन हुइल पैलेसे प्रचलित कानून बमोजिम कार्वाही हुइना व्यहोरा समेट सम्बन्धितमे जानकारी कराइल जिल्ला प्रशासन कार्यालय कैलाली विज्ञप्ती मार्फत जनैले बा ।
