सुदूरपश्चिममे सावन १३ गतेसे कोरोना विरुद्धके खोप लगैना

पहुरा समाचारदाता
धनगढी, १२ सावन । सुदूरपश्चिम प्रदेशमे सावन १३ गतेसे कोरोना विरुद्धके खोप लगैना हुइल बा ।

प्रदेशके ३ लाख ३५ हजार २ सय नागरिकहे खोप लगाजैना प्रदेश स्वास्थ्य आपूर्ति व्यवस्थापन केन्द्र जनैले बा । स्वास्थ्य तथा जनसंख्या मन्त्रालय, स्वास्थ्य सेवा विभागके पत्र अनुसार प्रदेशके सक्कु जिल्लामे सावन १३ गतेसे १७ गतेसम भेरोसेल ओ सावन १८ गतेसे २१ गतेसम जोनसोन एण्ड जोनसन खोप लगैना हुइल हो ।

भेरोसेल खोप ५५ बरससे उप्परके नागरिक, शिक्षक–कर्मचारी, सार्वजनिक यातायातके चालक तथा सह–चालक, अति अत्यावश्यक सेवाके कर्मचारी ओ खोप अनिवार्य करल देशमे जउइया नागरिकहे लगैना जनाइल बा ।

ओस्टके जोनोसेन एण्ड जोनसन खोप ५० से ५४ बरस उमेर समूहके नागरिक, पूर्ण ओ अति अशक्त अपांगता (वर्ग क ओ ख) के नागरिक, हाल नेपालमे बसोबास कैटी आइल शरणार्थी, स्वास्थ्यकर्मी, सरसफाईकर्मीहे लगाजैना हुइल बा । प्रदेश स्वास्थ्य आपूर्ति व्यवस्थापन केन्द्रके निमिक्त प्रमुख पदम बिष्ट सक्कु जिल्लामे खोप वितरणके काम जारी रहल बटैलै । उहाँ कञ्चनपुर, डडेल्धुराके लाग खोप पठाइल बटैलै । डोटी ओ अछामके लाग खोप पठैना तयारी करल निमित्त प्रमुख विष्ट बटैलै ।

प्रदेशके सक्कु जिल्लामे हाली खोप पुगैना मेरके काम सुरु करल स्वास्थ्य सेवा निर्देशक डाक्टर गुणराज अवस्थी बटैलै । स्वास्थ्य सेवा विभागसे प्रदेशके लाग १ लाख ३६ हजार ८ सय डोज जोनसोन ओ एक लाख ९८ हजार ४ सय डोज भेरोसेल पठाइल बा ।