रेशम चौधरी उपेन्द्र पक्षओर लग्लै
धनगढी, १३ सावन । टीकापुर घटनाके मुख्य दोषी आरोपमे थुनामे रहल जनता समाजवादी पार्टी जसपाके केन्द्रीय कार्यकारिणी सदस्य तथा सांसद रेशम चौधरी अपने उपेन्द्र यादव पक्षके जसपामे रहल प्रष्ट परले बाटै ।
चौधरी आधिकारिक पार्टीमे रहल ओ केन्द्रीय कार्यकारिणी सदस्य रहल जसपाके प्रवक्ता डम्बर खतिवडा बटैले बाटै । सावन ११ गते निर्वाचन आयोगसे जसपाके आधिकारिकता उपेन्द्र यादव पक्षहे डेना निर्णय करल रहे ।
आयोगके प्राङ्गणमे हेड काउन्ट करेबर यादव पक्षमे ३४ जाने केन्द्रीय कार्यकारिणी सदस्य खुलल् रहे । ५१ सदस्यीय कार्यकारिणीमे ३४ जाने उपेन्द्र पक्षमे खुलल्पाछे जसपाके आधिकारिकता यादव पाइल निर्णय आयोगसे सुनाइल रहे ।
मने, हेड काउन्टमे महन्थ पक्ष ओ उपेन्द्र पक्ष डुनु ओर नैखुलके तटस्थ बैठल चौधरी अन्ततः उपेन्द्र पक्षमे खुलल् खतिवडा ट्वीटमार्फत जनैले बाटै ।
‘माननीय रेशम चौधरी फोनवार्तामार्फत् व्यक्त करल इच्छा ओ तुल्सीलाल स्मृति भवनमे जारी जसपा बैठकके अनुमोदन मुताबिक चौधरी जसपा आधिकारिक पार्टीमे ओ पार्टी केन्द्रीय कार्यकारिणी समिति सदस्य कायमे रहल प्रष्ट कैना चाहटु,’ खतिवडा ट्वीट करले बाटै ।
