एसईईके नतिजा सावन २५ भिटर
काठमाडौं, १३ सावन । राष्ट्रिय परीक्षा बोर्ड सानोठिमी माध्यमिक शिक्षा परीक्षा (एसईई) के आन्तरिक मूल्याङ्कनके नतिजा यिहे सावन २५ गतेभिटर सार्वजनिक कैना हुइल बा ।
यिहे सावन २५ गतेभिटरमे २०७७ के एसईई नतिजा सार्वजनिक कैना करके अब्बे तीव्र रूपमे काम हुइटी रहल परीक्षा बोर्ड, परीक्षा नियन्त्रण कार्यालय (कक्षा १०) के परीक्षा नियन्त्रक रुद्र अधिकारी बटैलै ।
सक्कु जिल्लासे विद्यार्थीके मूल्याङ्कन नतिजा आके इन्ट्री सेक्के नम्बर रुजु कैना काम हुइटी रहल बटैटी उहाँ कौनो प्राविधिक कठिनाई नइआके आगामी शुक भिटर विद्यार्थीके नतिजा रुजु करसेक्ना ओ ओकर एक साताभिटरमे नतिजा सार्वजनिक कैना उहाँ बटैलै ।
कार्यालयके अनुसार २०७७ सालके एसईई परीक्षाके लाग पाँच लाख १७ हजार विद्यार्थी रजिष्ट्रेशन फारम भरल रहिट । दुसरा लहरके कोभिड–१९ सङ्क्रमण बढटी गैलपाछे करल निषेधाज्ञाके कारण गैल वैशाख २७ गते एसईई परीक्षा स्थगित हुइल रहे ।
गैल जेठ १३ से भौतिक रूपमे एसईई परीक्षा सञ्चालन कैना करके बोर्डसे तालिका सार्वजनिक करलेसेफे कोभिडके कारण परीक्षा हुई नइसेकलपाछे जेठ १७ गते बैठल मन्त्रिपरिषद् बैठकसे आन्तरिक मूल्याङ्कनसे नतिजा प्रकाशित कैना निर्णय करल रहे ।
बोर्डसे एसईईके विद्यार्थी मूल्याङ्कन, नतिजा प्रकाशन तथा प्रमाणीकरण कार्यविधि, २०७८ जारी करटी सैद्धान्तिकओर कौनोफे विषयमे ८० प्रतिशत वा उहीसे ढेर प्राप्ताङ्क प्राप्त कैना विद्यार्थीके विषगत शिक्षकसे का कारण उ नम्बर डेहल हो कहिके कारण खुलाई पर्ना जनैले बा ।
कोभिडके कारणसे २०७६ सालके एसईई परीक्षाके नतिजाफे आन्तरिक मूल्याङ्कनसे प्रकाशित करल रहे ।
