थरूहट थारूवान मोर्चासे भदौ ७ गते टीकापुर विद्रोह दिवस मनैना

पहुरा समाचारदाता
धनगढी, १४ सावन । थरूहट थारूवान राष्ट्रिय मोर्चासे अइना भदौ ७ गते टीकापुर विद्रोह दिवस मनैना हुइल बा ।

कैलालीके लम्की ओ बलियाहे केन्द्र विन्दु बनाके मोर्चासे कैलालीके सक्कु स्थानीय तहमे दिवस मनैना हुइल हो । मोर्चाके बुधके जोशीपुरमे हुइल जिल्ला बैठकसे केन्द्रीय समितिसे हुइल टिसरा चरणके आन्दोलनके अभियानहे सम्पन्न करक लाग बृहत अन्तरक्रिया कैना तथा जिम्मेवारी बाँडफाँट करले बा ।

मोर्चासे इहे सावन २७ गते टीकापुरमे टीकापुर घटना तथा मुद्दा सम्बन्धी सर्वपक्षीय अन्तरक्रिया कैना जनैले बा । ओस्टके भदौ ७ गते हुइना विद्रोह दिवस सम्पन्न करक लाग मोर्चाके जिल्ला सहसंयोजक लौटन चौधरीहे जिम्मा डेहल बा ।

ओस्टके टीकापुर घटनाके माग मुद्दाहे लेके भदौ १ गतेसे काठमाण्डौंके माइतीघर मण्डलामे सुरु हुइना धर्ना तथा कार्यक्रमके लाग कैलालीसे अर्थपूर्ण सहभागिता जनैना मोर्चाके कैलाली जिल्ला संयोजक माधव थारू बटैलै । यकर साथे उहाँ भदौ ७ गते हुइना टीकापुर विद्रोह दिवस सफल बनाइक लाग सक्कु पक्षहे आग्रह करले बाटै ।