विद्यालय खोल्ना विषयमे सीसीएमसीमे छलफल
काठमाडौं, १४ सावन । कोभिड–१९ संकट व्यवस्थापन केन्द्र (सीसीएमसी)से विद्यालय तथा विश्वविद्यालय कैसिक सञ्चालन कैना कना विषयमे सरोकारवालाके धारणा बुझले बा ।
बिफेक रोज सीसीएमसी ओ सरोकारवाला बीच शैक्षिक संस्था सञ्चालन कैसिक कैना विषयमे छलफल हुइल हो । छलफलमे सरोकारवालाहुक्रे केन्द्रीकृत निर्णय करे नइहुइना, जोखिम कम रहल ओ विद्यार्थीके संख्या कम रहल स्थानीय तहके विद्यालय खोल्न अनुमति डेहे पर्ना बटाइल सीसीएमसीके प्रवक्ता नुरप्रसाद खतिवडा जानकारी डेलै ।
सहभागीमन्से अधिकांशसे नम्मा समयसम विद्यालय, विश्वविद्यालय बन्द करटी रहना विद्यार्थी ओ राज्यके लाग घाटा हुइल ओरसे विकेन्द्रीकृत निर्णय कैना व्यवस्था हुई पर्नामे जोड डेहल रहिट ।
शिक्षासंग सम्बन्धित व्यक्तिहुकनसंगके छलफलसे शैक्षिक संस्था सुचारु करेक लाग स्थानीय तहसे निर्णय करे सेक्ना परिस्थिति बनैना सहज हुइना खतिवडा बटैलै ।
शिक्षा, विज्ञान तथा प्रविधि मन्त्रालयके सचिव रामप्रसाद थपलिया कम विद्यार्थी रहल विद्यालयके विषयमे सोचे सेक्ना हुइलेसेफे ढेर विद्यार्थी रहल विद्यालयहे तत्काल खुलैना अनुमति डेहे नइसेक्ना बटैलै ।
नेपाल अभिभावक महासंघके अध्यक्ष सुप्रभात भण्डारी शिक्षक ओ विद्यार्थीहे खोप डेके केल परीक्षा सञ्चालन कैना उपयुक्त हुइना धारणा रख्लै ।
छलफलमे सहभागीहुक्रे सय जानेसे कम विद्यार्थी रहल, जोखिम क्षेत्र कम हुइल स्थानमे विद्यालय खोल्ना अनुमति डेहे पर्ना, उमेर पुगल विद्यार्थी एवं शिक्षकहे खोपके व्यवस्था करे पर्ना सुझाव डेहल रहिट । सिकाइहे नियमित कैना संघीय सरकारसे मापदण्ड बनाडेहे पर्ना फे ओइने बटैलै ।
