सरस्वतीको दौडसँगे टोकियो ओलम्पिकमे नेपाली खेलाडीके चुनौती समाप्त
काठमाडौं, १५ सावन । धाविका सरस्वती चौधरीके १ सय मिटर दौडमे सहभागितासँगे नेपाली खेलाडीके टोकियो ओलम्पिक २०२० के यात्रा समाप्त हुइल बा । ओलम्पिकके सातौं दिन आज (शुक्रके) बिहान प्रारम्भिक चरणके ‘हिट्स २’ मे १२.९१ सेकेन्डमे दौड पूरा करल चौधरी राष्ट्रिय कीर्तिमान बनैना लक्ष्य भेट्टाइ नैसेक्लि । अपन समूहके नौ खेलाडीमध्ये उहाँ आठौं स्थानमे रहलि ।
ओलम्पिक रंगशालामे चौधरीसे करल प्रदर्शन यीआघेक उहाँक व्यक्तिगत रेकर्डसे फेन कमजोर हो । उहाँ दशरथ रंगशालामे दुई वर्षआघे हुइल १३औं दक्षिण एसियाली खेलकुद (साग) २०१९ मे १२.५५ सेकेन्डमे लक्ष्य पूरा करले रहि, जोन उहाँक १ सय मिटर दौडमे करिअरके उत्कृष्ट समय हो । उहाँ दोहामे हुइल वल्र्ड एथलेटिक्स च्याम्पियनसिप २०१९ मे १२.७२ सेकेन्डमे दौड पूरा करले रहि ।
नेपालके महिला १ सय मिटर स्पर्धाके राष्ट्रिय कीर्तिमान देवीमाया पनेरुके नाममे बा । उहाँ आठौं साफ गेम्स १९९९ (काठमाडौं) मे १२.२० सेकेन्डमे लक्ष्य पूरा करले रहि । सात महिनासे ढेर ओलम्पिकके तयारी करके फेन म्याराथन धावक गोपीचन्द्र पार्की अन्तिम समयमे टोकियो यात्रा करना अवसरसे वञ्चित हुइलओरसे चौधरी अवसर पैले रहि ।
यीबेर चार खेलमे नेपालके ५ खेलाडी प्रतिस्पर्धा करलैं । उमध्ये सुटिङके कल्पना परियार, पौडीके अलेक्जेन्डर गाडेगार्ड शाह ओ गौरिका सिंह राष्ट्रिय कीर्तिमान सुधार करलैं ।
महिला १ सय मिटरके प्रारम्भिक चरणके हिट्ससे २७ मध्ये १० खेलाडी पहिल चरणमे स्थान बनैलैं । तीनठो हिट्ससे शीर्ष तीन धाविकासँगे चौथो स्थानमे रहल तीन खेलाडीमध्ये उत्कृष्ट समयके आधारमे एक जाने पहिल चरणमे छनोट हुइलैं । पहिल चरणके प्रतिस्पर्धा फेन आझि हुइटा । सेमिफाइनल ओ स्वर्णपदकके प्रतिस्पर्धा शनिच्चर हुइटा ।
