ओलम्पिकके एक्के संस्करणमे जापान जिटल अभिनसमके ढेर स्वर्ण
काठमाडौं, १५ सावन । जापान अपन देशमे हुइटिरहल टोकियो ओलम्पिक २०२० मे १७ स्वर्णपदक जिटसेकले बा । यीआघे ढेर स्वर्ण जिटनामे आघे रहल अमेरिका ओ चीनहे यीबेर जापान टक्कर डेहटा ।
ओत्रे किल नैहो जापान एक्के ओलम्पिकमे सर्वाधिक स्वर्ण समेत जिटले बा । शुकके रोज फेन्सिङ अन्तर्गत पुरुष इपीमा टिममे स्वर्ण जिटपाछे जापान ओलम्पिक इतिहासमे एक संस्करणमे १७ औं स्वर्ण जिटल हो ।
जापान यीआघे सन् १९६४ मे अप्नही आयोजक हुके २००४ के एथेन्स ओलम्पिकमे समान १६ स्वर्ण जिटले रहे ।
घरेलु भूमिमे हुइटिरहल ३२ औं गृष्मकालिन ओलम्पिकमे जापान अभिनसम जुडोसे ९ स्वर्ण जिटसेकले बा । अस्टेक पौडीसे युई ओहासी एक्केलि दुई स्वर्ण जिट्ली ।
पहिलचो ओलम्पिकमे समावेश स्केटबोर्डिङमे जापान दुई स्वर्ण जिटके मोमीजी निसिया ओलम्पिकमे स्वर्ण जिटना जापानके सबसे कान्छी खेलाडी बन्लि ।
अस्टेक जापान टेबल टेनिस मिक्स्ड डबल्स ओ पुरुष फेन्सिङमे फेन स्वर्ण जिटले बा ।
जापान आठौं दिनसम आपुगटसम ४ रजत ओ ७ कास्य समेत जिटले बा । अभिन ९ दिनके खेल बाँकी रहल ओरसे जापान पदक थप्न सम्भावना ढेर बा ।
जापान १७ स्वर्णसहित दोसर स्थानमे बा । १९ स्वर्ण जिटके चीन शीर्ष स्थानमे बा ।
जापान एथेन्समे १६ स्वर्ण जिटलमे २८ खेलके ३०१ इभेन्ट समावेश रहे । यीबेर ३३ खेलके ३३९ इभेन्ट समावेश बा ।
