बैतडीके निषेधाज्ञा सावन मसान्तसम
बैतडी, १६ सावन । भारतसँग सीमा जोरल बैतडी जिल्लामे सावन मसान्तसम निषेधाज्ञा थपल बा । कोरोना भाइरसके जोखिम कायमे रहल ओरसे निषेधाज्ञाके अवधि सावन ३२ गते मसान्तसम थपल हो ।
यीआघे खुकुलो परटि जिल्लामे सावन १ से १५ गतेसम छैटौँ चो निषेधाज्ञा थपल रहे । आजसे लागू हुइना करके सातौँ चो निषेधाज्ञा थपल बैतडीके निमित्त प्रमुख जिल्ला अधिकारी खगेन्द्र भारती जानकारी डेलैं । कोरोना भाइरसके जोखिम कायमे रहल ओरसे निषेधाज्ञाके अवधिमे स्वास्थ्यके मापदण्ड अपनाइपरना जनाइल बा ।
निषेधाज्ञामे पसल बिहान ६ बजेसे साँझ ७ बजेसम सञ्चालनमे रहना बटागिल बा । अस्टेक विवाह, व्रतबन्धजैसिन धार्मिक कार्यक्रममे ढेरमे २५ जाने सहभागी हुके सम्पादन करेपरना जिल्ला प्रशासन कार्यालय जनैले बा । बैतडीमे गैल वैशाख २० गतेसे जारी करल निषेधाज्ञामे खुकुलो परिट लम्ब्याइल हो । कोरोना भाइरसके तेसर लहरके समेत चेतावनी आइल ओरसे सतर्क रहन स्वास्थ्यकर्मी आग्रह करले बटैं ।
जिल्लामे अब्बे २७ जाने कोरोनाके सक्रिय संक्रमित रहल बटैं कलेसे हालसम कोरोनाके कारण १८ जहनके मृत्यु हुसेकल बा ।
