अवैध बालु निकरुइया ११ ट्याक्टरहे कार्वाही
पहुरा समाचारदाता
धनगढी,१६ सावन । अवैध रुपमे बालु निकरुइया ११ ठो ट्याक्टरहे आवश्यक कारवाही करके सम्झाई बुझाई करके छोरल बा ।
शनिच्चरके रोज सकारे सात बजे जिल्ला कैलाली गोदावरी नगरपालिका–९ स्थित खुटिया खोलासे अवैध रुपमे बालु निकरटी रहल अवस्थामे जिल्ला प्रहरी कार्यालय ओ अस्थायी प्रहरी पोष्ट श्रीपुर कैलालीसे खटल प्रहरी टोली ११ ठो ट्याक्टरहे आवश्यक कारवाही करके सम्झाई बुझाई करके छोरल बा ।
अवैध बालु निकरटी रहल से २ त २८३५, से २ त ३६५५, से १ त ५३९७, से १ त २३६८, से १ त ९६१३, से १ त ४४९, से १ त ८७५९, से १ त ५४४९, सु.प.प्र.०१००२ त ५०७, सु.प.प्र.०१००२ त ५५४१ ओ सु.प.प्र.०१००२ त ४७२१ नम्बरके ट्याक्टरहे नियन्त्रणमे लेके आवश्यक कारवाही करके सम्झाई बुझाई करके छोरल जिल्ला प्रहरी कार्यालय कैलालीके प्रवक्ता प्रतिक विष्ट जनैलै ।
नियन्त्रणमे लेहल ट्याक्टरहे गोदावरी नगरपालिकाके कार्यालयसे खटल टोली जनही प्रति ट्याक्टर रू.६ हजारके दरसे राजश्व जरिवाना काटे लगाके सम्झाई बुझाई करके छोरल प्रहरी जनैले बा ।
