कर्णाली लडियामे बेपत्ता जोशी दम्पत्ती आभिन अज्ञात
धनगढी, १७ सावन । कर्णाली लडियामे जीप गिरके शुकके १२ बजेओर बेपत्ता हुइल एक दम्पत्ती आभिन अज्ञात रहल बाटै । जिल्ला प्रहरी कार्यालय कैलालीके अनुसार बा ११ च ९३८ नम्बरके जीप लडियामे क्षती ग्रस्त अवस्थामे भेटल रहे ।
मने पानीके बहावस उ गाडी लडियासे निकरना समस्या हुइल प्रहरी जनैले बा । जिल्ला प्रहरी कार्यालय कैलालीके प्रवक्ता तथा प्रहरी नायव उपरिक्षक प्रतिक बिष्ट लडियाके उच्च बहाव ओ धुमिल पानीके कारण खोजी कार्यमे कठिनाई हुइल बटैलै ।
डोटीके आदर्श गाउँपालिका–३ काँडेके चन्द्र प्रकाश जोशी ओ ओहकान गोसिनीया रुबी जोशी जीपसंगे कर्णाली लडियामे गिरल रहिट ।
ओहकानसंगे जीपमे रहल तीन बालबालिका भर घाहिल अवस्थामे लडिया किनारमे भेटल रहिट । जोशी दम्पत्तिके १२ बरसके छाइ लक्ष्मी जोशी, ४ बरसके सावित्री जोशी ओ २ बरसके छावा भुवन जोशी घाहिल अवस्थामे भेटल रहिट ।
उहाँहुक्रनके कोहलपुरस्थित नेपालगञ्ज मेडिकल कलेजमे उपचार हुइटी रहल बा । उहाँहुक्रे कर्णाली चिसापानीसे करिव साढे तीन किलोमिटर उत्तर मोहन्याल गाउँपालिका–७ बतासे डाँडासे जीप ब्याक कैना क्रममे लडियामे गिरल हुइ सेक्ना प्रहरी जनैले बा ।
उहाँहुक्रनके नेपाली सेना, सशस्त्र प्रहरी ओ नेपाल प्रहरी खोजी कार्य करटी रहल बा । कर्णाली लडियामे गाडीसंगे गिरके वेपत्ता हुइल जोशी दम्पत्तिके जीवित उद्दार हुइना आस मारसेकल सुरक्षाकर्मीके कहाइ रहल बा ।
