पारस खड्का लेनैं अन्तर्राष्ट्रिय क्रिकेटसे संन्यास

काठमाडौं, १९ सावन । नेपाली क्रिकेट टोलीके पूर्वकप्तान पारस खड्का अन्तर्राष्ट्रिय क्रिकेटसे संन्यास लेले बटैं । मंगरके रोज बिहान उहाँ सामाजिक सञ्जालमार्फत अन्तर्राष्ट्रिय क्रिकेटसे संन्यास लेहल घोषणा करल हुइँट् ।

झन्डे १० वर्ष नेपाली राष्ट्रिय टोलीके कप्तानी सम्हारल पारस २०७६ असोज २८ गते कप्तानसे राजीनामा डेले रहैं ।

पारस सन् २००४ मे मलेसियाविरुद्ध राष्ट्रिय टोलीसे पहिलचो खेलले रहैं । सन् २००९ मे विनोद दासहे प्रतिस्थापन करके नेपाली टोलीके कप्तानी सम्हारले रहैं । १० वर्षके बीचमे नेपाली क्रिकेटसे देखल सबमेरिक सपना साकार पर्ना समूहके नेतृत्व पारस करलैं । उहाँ नेपाली क्रिकेटमे अभिनसमके सर्वाधिक सफल कप्तान हुइट् । नेपालहे आईसीसी विश्व क्रिकेट लिग डिभिजन–५ से ट्वान्टी–२० विश्वकप ओ एकदिवसीय अन्तर्राष्ट्रिय मान्यता डेहुइया पारस खेलाडी ओ कप्तानके रूपमे खेलल भूमिका अविश्वसनीय बा ।

उहाँ नेपालके लाग एकदिवसीय अन्तर्राष्ट्रिय, ट्वान्टी–२० अन्तर्राष्ट्रिय ओ ट्वान्टी–२० मे सर्वाधिक रन बनैना खेलाडी हुइट् । पारस नेपाली टोलीसे १० ठो अन्तर्राष्ट्रिय एकदिवसीय खेल खेलले बा । उहाँ १० खेलसे ३१५ रन बनैले बटैं । अस्टेक उहाँ ट्वान्टी–२० अन्तर्राष्ट्रियमे ७९९ ओ ट्वान्टी–२० मे ५६ खेलमे १ हजार ३ सय ७७ रन बनैले बटैं ।

३३ वर्षे उहाँ नेपालके लाग एकदिवसीय अन्तर्राष्ट्रिय ओ ट्वान्टी–२० अन्तर्राष्ट्रियमे शतक बनैना पहिल खेलाडी हुइट । उहाँके कप्तानीमे नेपाल २०१४ मे बंगलादेशमे टी–२० विश्वकप खेलले रहे कलेसे २०१८ मे जिम्बाब्वेमे हुइल विश्वकप छनोटसे एकदिवसीय अन्तर्राष्ट्रिय मान्यता पैले रहे ।

पारसलिख्ले बटैं–

सक्कु नेपाली क्रिकेटके समर्थक ओ सरोकारवाला प्रति कृतज्ञता व्यक्त करटि अन्तर्राष्ट्रिय क्रिकेटसे मै संन्यास लेना निर्णय लेले बटुँ । नेपालके लाग खेल्न मोर जीवनके सर्वश्रेष्ठ उपलब्धि हो ।

२००२ मे १५ वर्ष हुइके मै सुरु करल क्रिकेट यात्रामे साथ, समर्थन, माया ओ हौसला डेहल प्रशिक्षकहुक्रे, संघरिया खेलाडीहुक्रे, प्रशंसकहुक्रे, सरोकारवालाहुक्रे, मिडियाकर्मी, मोर परिवार ओ संघरियाहुकनप्रति मै सदैव ऋणी रहम ।

क्रिकेटरके रूपमे मै अपन मन, वचन ओ कर्मसे कर्तव्यनिष्ठ हुके देश ओ नेपाली क्रिकेट जगतके उत्थानके लाग सदैव अपन भूमिका निर्वाह करनु । मोर जीवनमे मै देखल सपना कलेक नेपाली क्रिकेटके उन्नति हो, मने यकर लाग सक्कु क्रिकेट समाज ओ सरोकारवालाहुकनके संयुक्त प्रयासके आवश्यकता बा । इमानदारिताके साथ काम करना हो कलेसे हम्रे नेपाली क्रिकेटहे अवश्य फेन एक नयाँ उचाइमे पुगाइब ।

अन्तर्राष्ट्रिय क्रिकेटरके रूपमे मोर यात्रा ओराइल बा, मने नेपाली क्रिकेटके लाग मोर सपना भर अभिन फेन बामे सरटा ।

मैदान भित्तरके यी दुई दशक, जीवन रहटसम, मिठ यादके रूपमे मोरसँग रहि । हम्रे सबजे मिलके नेपाली क्रिकेटहे नयाँ उचाइमे पुगाब कना विश्वास लेले बटुँ ।

पारसके कप्तानीमे नेपाली क्रिकेटके मुख्य उपलब्धि

२००९ नोभेम्बर– एसीसी ट्वान्टी–२० प्रतियोगितामे कप्तानी जिम्मेवारी
२०१०– विश्व क्रिकेट लिग डिभिजन–५ उपाधि
२०११– एसीसी ट्वान्टी–२० कपमे सेमिफाइनल
२०१२– विश्व क्रिकेट लिग डिभिजन–४ उपाधि
२०१२– ट्वान्टी–२० विश्वकप छनोटमे सातौं
२०१३– विश्व क्रिकेट लिग डिभिजन–३ उपाधि
२०१३– एसीसी ट्वान्टी–२० फाइनल
२०१३– विश्वकप छनोटमे तेसर हुइलपाछे विश्वकपमे ऐतिहासिक छनोट
२०१४– ट्वान्टी–२० विश्वकपमे अफगानिस्तान ओ हङकङहे हटाके फेन बंगलादेशसँग पराजित, समूहसे बाहेर
२०१४– एकदिवसीय विश्वकप छनोटमे नवौं हुके डिभिजन २ से रेलिगेसन
२०१४– विश्व क्रिकेट लिग डिभिजन–३ उपाधि
२०१५– से २०१७ सम विश्व क्रिकेट लिग च्याम्पियनसिप
२०१७– विश्व क्रिकेट लिग डिभिजन–२ फाइनल
२०१८– एकदिवसीय विश्वकप छनोटमार्फत ऐतिहासिक एकदिवसीय अन्तर्राष्ट्रिय मान्यता
२०१९– ट्वान्टी–२० विश्वकपके एसियाली छनोटमे सिंगापुरसँग पराजित हुके बाहेर