गड्डाचौकी नाका होके भारत जउइया महिलाहे कडाइ
कञ्चनपुर, १९ सावन । कञ्चनपुरके गड्डाचौकी नाका होके भारतओर जउइया महिलाहे निगरानी राखे लागल बा । बेचविखनमे परे सेक्ना आशंकामे महिलाहुक्रनहे सोधपुछ पाछे किल भारतओर जाइ डेना करल बा ।
मानव बेचबिखन रोकथाम ओ नियन्त्रणके लाग सीमा क्षेत्रमा कार्यरत गैरसरकारी संस्थासे महिलाहुक्रनहे भारतमे बेचबिखनमे परे सेक्ना आशंकामे प्रहरीके सहयोगमे सोधपुछ करलपाछे किल भारत जाइ डेहल बा ।
कोरोना महामारी संक्रमणके बेला महिलाहे ललाईफकाई भारतमे बेचे लैजाइ सेक्ना हुइल ओरसे सीमा नाकामे प्रहरी ओ गैरसरकारी संस्थासे उच्च सतर्कता बह्राइल हो । भारत जउइया महिलाके घर परिवारसे यकिन जानकारी आइलपाछे किल उहाँहुक्रनहे जाइ डेहल थ्री एन्जल्स नेपालके संयोजक बेलुदेबी नेपाली बटैली ।
ओहकान अनुसार कोरोना महामारी संक्रमणमे फेन दैनिक रुपमे ५० जानेसे ढिउर महिला दैनिक भारत जैना करल बाटै । इलाका प्रहरी कार्यालय गड्डाचौकीसँगके सहकार्यमे महिलाहे सोधपुछ कैके परामर्श डेना करल नेपाली बटैली ।
मानव बेचबिखनमे संलग्न गिरोहसे महिलाहे भोज, जागिर, घुमघामके प्रलोभनमे भारत लैजाके बेच्ना करल बाटै । सीमा नाकामे कडाइ हुइलपाछे उहाँहुक्रे अवैध डगरा होके महिलाहे भारत पुगैना करल बाटै । इलाका प्रहरी कार्यालय गड्डाचौकीके इन्चार्ज प्रहरी नायब निरीक्षक जीवन गुरुङ सीमा अपराध नियन्त्रणमे स्थानीय प्रशासन, जनप्रतिनिधि, गैरसरकारी संस्था सक्कुजनहनसे सहकार्य कैके आघे बह्रल बटैलै ।
