कैलालीमे पाजैना चिँरै नामक पुस्तक विमोचन
कैलाली, २० सावन । कैलालीमे पाजैना चिँरै ओ चिँरैनके अवलोकन नामक पुस्तक विमोचन करल बा ।
प्रदेश सरकार उद्योग पर्यटन वन तथा वातावरण मन्त्रालय प्रदेश विकास कार्यक्रम कार्यन्वयन इकाई ओ नेपाल पन्छी संरक्षण संघ नेपालके सहकार्यमे प्रकाशित पुस्तक विमोचन करल हो ।
सुदूरपश्चिम प्रदेश सरकार उद्योग पर्यटन वन तथा वातावरण मन्त्रालयके प्रदेश स्तरीय २ दिने समिक्षा गोष्ठीमे उद्योग पर्यटन वन तथा वातावरण मन्त्री मानसिंह धामी उ पुस्तक विमोचन करल रहिट ।
नेपाल पन्छी संरक्षण संघका सुदूरपश्चिम प्रदेश संयोजक हिरुलाल डंगौरा ओ बृहत घोडाघोडी पर्यटन विकास बोर्डका उपाध्यक्ष, चरा विशेषज्ञ, चरा संरक्षण नेटर्वकके अध्यक्ष दयाराम चौधरी उ पुस्तक लिखल हुइट । उ पुस्तक कैलालीके पहिल पुस्तक रहल दाबी करल बा ।
पुस्तकमे नेपालमे पाजैना ८८६ प्रजातिके चिँरै मध्ये कैलालीमे ४९६ प्रजातिके चिँरै मिल्ठै कना जानकारी डेहल बा । ओस्टके नेपालमे मिल्ना ४३ विश्वके दुर्लभ चिँरै मध्ये २१ प्रजातिके चिँरै कैलालीमे पाजैना उल्लेख करल बा । कैलालीमे पाजैना चिँरै बुडीफोरलुच, राजलहासे राजधानेश, डंगरगिद्द, सानोखैरेगिद्द, गोबरेगिद्द लगायतके चिँरैनके बारेम समाबेश करल बा । ओस्टके राष्ट्रिय रुपमे संकटापन्न अवस्थामे रहल ८१ प्रजातिके चिँरैनके बारेम फेन समाबेश करल बावै ।
कैलालीमे पाजैना चिँरैनके अवस्था, चिँरैनमे पर्ना खतरा ओ संरक्षणके चुनौतीबारे फेन समावेश करल बा । इ पुस्तकसे चिँरै संरक्षण, अनुसन्धान ओ चिँरै अवलोकन पर्यटनहे सहयोग पुगैना नेपाल पन्छी संरक्षण संघके सुदूरपश्चिम प्रदेश संयोजक डंगौरा बटैलै ।
उद्योग पर्यटन वन तथा वातावरण मन्त्रालयके प्रदेश सचिव यज्ञनाथ दाहालके सभापतित्वमे हुइल समीक्षा गोष्ठीमे सुदूरपश्चिम प्रदेशके ९ जिल्लाके डिभिजन वन कार्यालयके प्रमुख संरक्षणके क्षेत्रमा काम करुइया निकाय एवं तराई भुपरिधी तालके प्रतिनिधि ओ नेपाल पन्छी संरक्षण संघके प्रतिनिधिहुक्रनके सहभागिता रहल रहे ।
