कोभिड–१९ के तेसर लहर सुरु, स्वास्थ्य मापदण्ड पालना करना विज्ञके सुझाव

काठमाडौं, २१ सावन । कुछ दिनयहोर देशभर कोभिड–१९ से संक्रमित हुइनाके संख्या ह्वात्ते बह्रे लागल बा । आघेक दिनसम तीन हजारके हाराहारीमे रहल कोभिड संक्रमण बुधके रोज अप्रत्यासित रूपमे बह्रके संक्रमित हुइनाके संख्या चार हजार नाघल बा ।

कोरोना संक्रमितके संख्या अप्रत्यासित रूपमे बह्रे लागलपाछे सम्बन्धित विज्ञहुक्रे यिहिनहे कोभिड–१९ के तेसर लहरके सुरुवात हुइल बटैले बटैं । उहाँहुक्रे खोपहे प्राथमिकताके साथ आघे बह्रैना सुझाव डेटि जनस्वास्थ्यके मापदण्ड पालना करना फेन सबहे आग्रह करले बटैं ।

तेसर लहरके सुरुवात

वरिष्ठ भाइरोलोजिष्ट डा. वासुुदेव पाण्डे नेपालमे कोभिड–१९ के तेसर लहर सुरु हुइल कहे मिल्न बटैठैं । सरकार ओ नागरिकके लापरबाहीके कारण कोभिड बह्रल कटि उहाँ नियन्त्रणके लाग अपन–अपन क्षेत्रमे सतर्क हुइपरना ओ उचित पहल करेपरना बटैठैं । कोभिड बह्रनाके प्रमुख कारणबारे डा. पाण्डे कलैं, सरकारी क्षेत्रसे टमान कार्यक्रम सञ्चालन हुइना, राजनीतिक दलके व्यक्तिहुक्रे नाराजुलुस ओ टमान सभा सम्मेलन करना, नागरिक जनस्वास्थ्य मापदण्ड कार्यान्वयन नैकरना प्रमुख कारण हो ।

“हाल सहर बजारमे कोभिडहे बेवास्ता करटि नागरिक निर्धक्क नेंगे लागल बटैं,’ वरिष्ठ भाइरोलोजिष्ट डा. पाण्डे कलैं, “सार्वजनिक सवारीसाधनमे नेंलेसे मास्क नैलगैना तथा ठेलमठेल करके आउ जाउ करले बटैं । यिहिनसे और समस्या पारटा ।”

लकडाउनसे किल नियन्त्रण नैहुइ

इपिडिमियोलोजी तथा रोग नियन्त्रण महाशाखाके पूर्वनिर्देशक समेत रहल डा. पाण्डे लकडाउनसे किल कोभिड नियन्त्रण नैहुइना बटैलैं । देशके आर्थिक अवस्था चलायमान करना फेन लकडाउन नैकरेपरना कटि उहाँ सवारीसाधनमे जोरबिजोर करना, गाडीमे धेर मनै नैचह्रना, कार्यालयमे फरक फरक समय काम करना मेरिक लकडाउनमे जाइ सेक्ना धारणा ढरलैं ।

जनस्वास्थ्यके मापदण्ड प्रभावकारी ढंगसे पालना करना हो कलेसे संक्रमण दरहे घटाइ सेक्ना डा. पाण्डेके कहाइ बा । लकडाउनमे गैलेसे रोजगारी गुमल व्यक्तिहुकनके जिम्मा राज्यसे लेहेपरना उहाँ बटैलैं । जापान, अस्ट्रेलियालगायतके विकसित देशमे यदि लकडाउन हुइल अवस्थामे रोजगारी गुमलहुकनहे राज्य सात सय डलरसम डेना करल बा, डा. पाण्डे कलैं, “नेपालमे भारी बोक्न भरियाहुक्रे काम नैपाके भोक मर्न स्थिति बा । अइसिन वर्गहे राज्य हेरडेहकपरठ ।”

अस्टेक, वरिष्ठ सरुवा रोग विशेषज्ञ डा. शेरबहादुर पुन तेसर लहरके स्थिति देखा परल कटि उहिनहे सामना करना तयारी अवस्थामो रहेपरना बटैलैं । तेसर लहर आसेकल कहे नैमिल्न कटि उहाँ सरकारसे कोभिड नियन्त्रणमे प्रभावकारी काम करेपरनामे जोड डेलैं । पछिल्का समय कोभिडप्रति हेल्चक्र्याइँ करे लागल धारणा ढरटि उहाँ खोप केन्द्रसे कोभिडके संक्रमण बह्रना जोखिम रहल बटैलैं ।

खोपके महाअभियान आवश्यक

सरुवा रोग विशेषज्ञ डा. पुन कोभिडविरुद्धके खोपके महाअभियान सञ्चालन करेपरना बटैलैं । जत्रा फेन खोप उपलब्ध बा, उहिनहे यथाशीघ्र लगैना काम करेपरना उहाँक कहाइ बा । कोभिड खोपसे किल बचे सेक्ना कटि डा. पुन खोपहे सरकार प्राथमिकता डेहेपरनामे जोड डेलैं ।

– गोरखापत्रसे