सावन महिनापाछे कोरोना संक्रमण घट्टि जैना स्वास्थ्य मन्त्रालयके प्रक्षेपण
काठमाडौं, २१ सावन । स्वास्थ्य तथा जनसंख्या मन्त्रालय सावन महिना पाछे कोरोना संक्रमितके संख्या क्रमशः घट्टि जैना प्रक्षेपण करले बा ।
सावन महिनामे किल ५३ हजारसे ढेर नयाँ संक्रमित थपना पूर्वानुमान करल मन्त्रालय यी संख्या घट्टि जाके मंसिर महिनासममे २५ हजार पुग्ना प्रक्षेपण करल हो ।
स्वास्थ्य मन्त्रालयके नीति योजना तथा अनुगमन महाशाखा प्रमुख डा. गुणराज लोहनी बिफेक रोज संसदके शिक्षा स्वास्थ समितिमे पेश करल विवरणमे सावनमे ५३ हजार ३०७, भदौमे ४५ हजार ७२६, कुँवार महिनामे ३८ हजार ५ सय ९७ ओ कार्तिक महिनामे ३१ हजार ४४ जाने नयाँ संक्रमित थपन उल्लेख बा । अगहन महिनामे यी संख्या और घटके २५ हजार १८३ पुग्ना सम्भावना रहल लोहनी बटैलैं ।
सावनसे अगहनसमके पाँच महिनाके अवधिमे १ लाख ९३ हजार ८ सय ५६ जाने नयाँ संक्रमित थपन सम्भावना रहल लोहनीसे पेश करल विवरणमे उल्लेख बा ।
पाँच महिनाके अवधिमे थपल नयाँ संक्रमितमध्ये ३८ हजार ७ सय ७१ जहनहे उपचार सेवा आवश्यक पर्न बा । उमध्ये ९ हजार ६ सय ९३ जहनहे सघन उपचारके आवश्यकता परे सेक्ना लोहनी उल्लेख करलैं ।
स्वास्थ्य मन्त्रालयके अनुसार सावन २० गतेसम होम आइसोलेसनमे ३० हजार २७० जाने, संस्थागत आइसोलेसनमे ३ हजार १९४ जाने, आइसियूमे ७१४ जाने ओ भेन्टिलेटरमे १५६ जाने उपचाररत बटैं ।
अस्टेक पहिल मात्रा खोप प्राप्त करनाके संख्या ४२ लाख ९७ हजार ६१२ ओ पूर्ण खोप प्राप्त करइनाके संख्या २० लाख ७४ हजार बा ।
