थप ३ हजार ७ मे कोरोना पुष्टि

काठमाडौं, २१ सावन । बिटल २४ घण्टामे नेपालमे ३ हजार ७ जहनमे कोरोना भाइरस संक्रमण डेखाइल बा । स्वास्थ्य तथा जनसंख्या मन्त्रालयके अनुसार ११ हजार ८७० पीसीआर परीक्षणमे बिफेक रोज थप ३ हजार ७ जहनमे संक्रमण पुष्टि हुइल हो ।

अस्टेक एन्टिजेन विधिसे करल ६ हजार ५३८ परीक्षणसे ९३१ जहनमे पोजिटिभ डेखाइल बा । २४ घण्टामे पीसीआर ओ एन्टिजेन विधिसे करल १८ हजार ४०८ परीक्षणमे ३ हजार ९३८ जहनमे संक्रमण पुष्टि हुइल मन्त्रालय जनैले बा । यीसँगे नेपालमे कोरोना संक्रमण हुइनाके संख्या ७ लाख ८ हजार ७९ पुगल बा ।

बिटल २४ घण्टामे थप २ हजार १२ जाने संक्रमणमुक्त हुइल बटैं । हालसम नेपालमे कोरोनामुक्त हुइनाके संख्या ६ लाख ६३ हजार ६६३ बा ।

नेपालमे कोरोना संक्रमणसे थप ३७ जहनके मृत्यु हुइल बा । यीसँगे नेपालमे कोरोनासे मृत्यु हुइनाके संख्या ९ हजार ९९४ पुगल बा ।