कैलारीमे २० प्रतिशत लगैलैं कोरोनाविरुद्धके खोप
पहुरा समाचारदाता
हसुलिया, २१ सावन । कैलालीके कैलारी गाउँपालिकामे हालसम १२ हजार १२५ जाने कोरोनाविरुद्धके खोप लगैले बटैं । कोभिशिल्ड, भेरोसेल ओ जोन्सन एण्ड जोन्सन करके उ संख्याहे खोप लगाइल हो । जोन खोप लगैना योग्य जनसंख्याके २० प्रतिशत हुइठ ।
उ गाउँपालिकामे करिब ६० हजार जनसंख्या रहल बा । जोनमध्ये खोप लगैना योग्य १८ वर्ष उमेरउप्परके जनसंख्या ४० से ५० हजारके हाराहारीमे रहल गाउँपालिकाके स्वास्थ्य शाखा जानकारी डेहल बा ।
हालसम खोपके दुनु डोज चार हजार ५०० जाने पासेकल स्वास्थ्य शाखा प्रमुख वीरेन्द्र सापकोटा जानकारी डेलैं । अस्टेक, पहिल डोज मात्रा लगाइलके संख्या साढे सात हजार रहल बा । खोप लगैना योग्य करिब ३० हजार जाने व्यक्ति अभिन खोप लगैना बाँकी रहल उहाँ बटैलैं ।
कैलारी गाउँपालिकामे अभिनसम कोभिशिल्ड चार हजार ८८७ जाने लगैले बटैं । जोनमध्ये ५०२ जाने दुनु मात्रा पूरा करसेकले बटैं कलेसे चार हजार ३५० जाने दोसर डोज लगैना बाँकी बा । अस्टेक, भेरोसेलके दुनु डोज ५०० जाने लगैले बटैं कलेसे तीन हजार ४०२ जाने पहिल डोज खोप लगाइल स्वास्थ्य शाखा प्रमुख सापकोटा बटैलैं । अस्टेक, जोन्सन एण्ड जोन्सन खोप तीन हजार ३३६ जाने लगैले बटैं ।
गाउँपालिकामे हरेक चरणमे जनसंख्याके आधारमे खोपके मात्रा आइल ओ अभिनसम पठाइल खोप तोकल समूहहे पुगल सापकोटा उल्लेख करलैं ।
