भूमि आयोग विघटनविरूद्ध सर्वोच्चमे रिट

काठमाडौँ, २२ सावन । भूमिसम्बन्धी समस्या समाधान आयोग विघटनविरूद्ध सर्वोच्च अदालतमे रिट दायर हुइल बा । अधिवक्ता प्रवेश केसी शुकके आयोग विघटन संवैधानिक ओ कानुनी डुनु हिसाबसे नैमिल्ना तर्क कैटी रिट दायर करल हो । रिट निवेदन दर्ता होके सावन २५ गते पेसी तोकल सर्वोच्च अदालत प्रशासन जनैले बा ।

रिट निवेदनमे केसी संविधानके धारा ३७ ओ ४० मे आवास ओ भूमिहीन दलितसम्बन्धी हक रहल ओ उ हकके उद्देश्य प्राप्त नैहुइटी आयोग विघटन करे नैमिल्ना तर्क करले बाटै । केसीसे आयोग विघटन करेबर संवैधानिक प्रबन्धसहित भूमि ऐन २०२१ बमोजिमके कानुनी व्यवस्था उल्लंघन हुइल जिकिर करले बाटै ।

उहाँ कानुनबमोजिम भूमि आयोगके पदाधिकारी हटाइ मिल्ना मने आयोग नै विघटन करे नैमिल्ना निवेदनमे उल्लेख करले बाटै । सरकारसे गैल मंगरके भूमिसम्बन्धी समस्या समाधान आयोग विघटन कैना निर्णय करल रहे ।