सेती अस्पतालमे उपचाररत २ कोरोना संक्रमितके मृत्यु
पहुरा समाचारदाता
धनगढी, २२ सावन । धनगढीके सेती प्रादेशिक अस्पतालमे उपचाररत २ कोरोना संक्रमितके मृत्यु हुइल बा ।
डोटीके शिखर नगरपालिका–३ के ६५ वर्षीया महिला ओ दिपायल सिलगढी नगरपालिका–१ के ३३ बर्षीय पुरुषके मृत्यु हुइल अस्पतालके सूचना अधिकारी दिलीप कुमार श्रेष्ठ जानकारी डेलै ।
मृतक महिला सावन १७ गतेसे अस्पतालके आइसीयुमे उपचाररत रही । पुरुष सावन २१ गतेसे अस्पतालके भेन्टिलेटरमे उपचाररत रहिट ।
पाछेक समय अस्पतालमे कोरोनाके बिरामीके संख्या फेन बह्रटी गैल बा । सूचना अधिकारी श्रेष्ठके अनुसार पाछेक २४ घण्टामे ६ कोरोनाका बिरामी उपचारके लाग अस्पतालमे भर्ना हुइल बाटै । भर्ना हुइल बिरामी संगे सेतीमे उपचाररत कोरोना संक्रमित बिरामीके संख्या २९ पुगल बा । जौन मध्ये ७ जनहनके आइसीयु ओ २ जनहनके भेन्टिलेटरमे उपचार हुइटी रहल बा ।
ओस्टके अस्पतालमे थप २४ जनहनके कोरोना पुष्टि हुइल बा । १ सय २१ नमूना परिक्षण करेबर २४ जनहनमे संक्रमण पुष्टि हुइल हो ।
